Sahrang le ral hma a zam ngai lo Paletwa Yatihtaung kahnaah firfiak sipai 37 an thih thu leh ralthuam engemaw zat an lak thu AA-in an puang

AA leh firfiak sipaite inkarah Paletwa leh Yatitaung hmun 4-ah August ni 13-a inkahna chhuakah sipai lamah 37 lai an thih thu leh ralthuam engmaw zat an laksak thu Arakan Army (AA) chuan thuchhuah an siam a ni.

August ni 13 zing lam dar 7:35 vela inkahna chhuak hmasa ber chu Arakan state, Yatitaung township, Dinepiet (ဒုံးပိုက်) khaw bulah niin, firfiak sipaite leh border guard tangrualte operation neihnaah inkahna a chhuak a, darkar 2 vel AA lam nena an inkahnaah sipai 31 an thi a, hliam pawh an awm nual thu hriat a nih rualin, AA lamah pawh an sipai thenkhat an hliam thu hriat a ni.

Yatitaung, Dinepiet khuaa inkahnaah military council sipai lam rualthuam, 60mm 1, MA-3 15, MA-1 6, MA-4 2, Pistol 1, inbiakpawhna khawl 1, GPS 2, Jammer khawl 1 telin sipai thuam leh puakthei thil dangte khawm a ni a.

A vawi hnih inkahna Arakan state, Maungdaw township, ကျောက်ပန်းဒူ khaw bula, August ni 13, chhun dar 12 vela, firfiak sipai IB 270 leh AA te inkahna chu darkar khat leh a chanve vel a rei a, military council sipai lamah 6 an thi a, hliam an awm nual bawk a, silai te chi 4 telin puakthei thil, sipai thuam leh damdawi lam thilte pawh an laksak leh bawk thu hriat a ni.

August ni 13 chawhma lam dar 11:30 vela a vawi 3-na inkahna chu Arakan leh Bangladesh ramri စပု-ah niin, LIB 352 sipaite leh AA te chu an inkap a, AA lamin Silai lian chi leh a te chi thenkhat bakah, Pistol 2, MG 43 silai 1, Drone 2, Jammer 1, inbiakpawhna stellate phone 1, bomb chi hrang hrang telin puakthei thil te, sipai hmanruate, damdawi leh ration (ei tur) tam tham tak bawmrang 30 chuang vel zet an laksak bawk a.

August ni 13-ah Paletwa township, Tathikone khaw chhim lamah inkahna a chhuak bawk a, chu mi hmuna inkahna chuan chawlhkar hnih vel a awh tawh a, August ni 14-ah chuan inkahna chhuak lo mah se, military council sipai lamin inkahna thin hmun velah laipui an hmeh pua thin thu hriat a ni.

August ni 15-ah Military council lamin ralthuam, puakthei leh force te chu helicopter hmangin a chhawp belh a, a sawn kual mai bakah, sipai lawng te, lawng lian tak tak hmanga ration a chawhluh zel avangin, Arakan (Rakhine) state inkahna nasa zawk chhuak thei dinhmuna a awm chho thu AA lam chuan thuchhuahah an tarlang a.

AA chuan firfiak sipaite operation leh beihna dan hrang hrangte chu tanrual pawlte, Alliance pawlte, leh mipuite nen mumal taka beih let zel an tum thu official-in thuchhuah an siam bawk a ni.

 

Author: admin

Leave a Reply

Your email address will not be published.