Kalaymyo-ah CDM Zirtirtu Hmeichhia Tiamin Mi 4 An Man An man tak mi 4 te hi mipa 2 leh hmeichhia 2 an ni a, hmeichhe pakhat hi CDM-a zirtirtu a ni.

Sagaing Region, Kalaymyo township, Aungmingalar (Awng Min Ga La) Venga awm, tualchhung mi 4 te chu PDF te nen, inhnamhnawih anga an puh avangin July 27,28 khan Military Council ten an man thu tualchhung mi ten an sawi.

Aungmingalar Veng chhunga mi pakhat chuan “Military Council ten ni 2 chhungin tualchhunga chenna in 2-ah an luh chilh a, Ni khatnaah mi 3 an man a, ni hnihnaah mi 1 an man. An man tak te ina Thirsakawr, Buhfai leh Tel bakah bungrua an chhuhsak nual bawk. An man hlim hian an chenna inah an sawisak thawm hriat a ni a. An man zingah hian CDM lut Zirtirtu hmeichhia pakhat a tel” tiin a sawi.

He Vengah hian Military Council-te thu petu an awm thin avangin heti hian tualchhung mi an man a. Heng an mi man te hi Military Regional Command (Dah Kah Sah) hmunpui chhungah an hruai lut niin an sawi.

July 25 pawh khan Military Council ten, Kalaymyo Sipai hmunpui Dah kah Sah, kiang lawk, Swan Arr (Suan Aa) Phone siamna Dawra, Phone siam zir, tleirawl mi 5, an man tawh bawk.

Military Council ten, sorkarna an lak hnu hian Kalaymyo khawpui chhungah mi 500 chuang a man tawh a, mi 100 chuang an thah tawh thu, tualchhung kawngzawh pawl hnen atanga hriat a ni.

 

Author: admin

Leave a Reply

Your email address will not be published.