US, North Dakota vansang boruak cu danglam zetin aum. July 22, 2022 zanlam ah Lansford khua kiangah khuadur danglam zet a herkual rero.
Tualsung mipi pawlin an hmu ih an ṭih tuk, ṭhenkhat in leilungpi lenglam ih um UFO pawl an tum zik a si ding an ti.
Boruak lam zingzoitu pawlin, “Hivek khuadur danglam zetin thlisia, phusing (cyclone) thazang cak zet a hringsuak thei” tin ralrinnak dar an tum. A zan ah phusing cu a hrang lo nan thlisia a hrang ih inn ṭhenkhat le thingkung a siatsuah.
India, Bihar ramsung ah ṭek in minung 20 a tlak that, nazi 24 sungah minung 20 an thi. July 25, 2022 zanlam ihsin a thaisun tiang ṭek a tla ciamco.
July 27-28 khalah nikhua a sia lai ding tin an phuang ih ralringten um cio dingin simthan awknak an nei. Thalcaan ah khua a hlum tuk ih furcaan (monsoon) thok zik ah nasa zetin ṭek a tla ṭheu.
India ram ah kumtinten ṭek tlak ruangah minung 100 lenglo an thi. Cozah in mithi innsang hnenah Rs.400,000 ciar pe dingin a phuang ih ṭek khamnak khal bun dingin ṭuanvo neitu pawl hnenah a fial.
