Raltlan Pawl In Hramlak Ah Ei Le In An hawl nak ah Kum 71 Ih Upa Hawl Ih Rul In A Cuk That

Tanintharyi, Dawei District, Kayin Taung Pyauk ramsung ih um raltlan putar kum 71 mi U Kyaw Win cu ramlak ah rawlhmeh ding hanghnah hangrah a hawl rero laiah rul in a cuk ih a hmun ah a thi cih. U Kyaw Win hi Kywe Chan khuami a si, a hlan ahcun kuva hmuan a tuah ih naa pawl a kilkhawi ṭheu.

An khua kiangkap doawknak ruangah raltlan in aum. Raltlan sakhan ih ṭuanvo neitu in, “July 12, 2022 sun ah tupi sungah hanghnah hangrah hawl dingin a fehsuak ih rul in a cuk. A tarcak nawn lo ruangah a au thei lo, rul in a cuknak hmun ah a tlu ih a thi cih. A thihnak hmun hi tupi sung thuk zet a si ruangah a ruak hawl khal a harsa zet” a ti.

Kayin Taung Pyauk raltlan sakhan ah raltlan 6000 lenglo an um ih siivai, ei le in, muku pawl an ṭul thu khal a rel. Ralhrang in ramsung thuneihnak an lak hnuah Kayin Taung Pyauk ah raltlan 2 an thi zo. Pakhat cu kum 92 mi Daw Inn May a si.

Ṭuanvo neitu in, “An tlan laiah motor hi dunglam ah a kir. Motor dungih um thirhri in a vuak ngah. Pitar kum 90 luan zo a si ih thazang khal a nei lo. Hliamhma nazet a tuar nan siikhan fehnak ding a harsat ruangah vanduainak a tong” a ti.

Author: admin

Leave a Reply

Your email address will not be published.