Mipi le rampi karlak tlukruannak caah kan thah hna a si tiah SAC Major-General Zaw Min Htun nih Press Conference ah a chim.

Mipi le rampi karlak tlukruannak caah kan thah hna a si tiah SAC nih a chim.2022 July 27 – Myanmar ram Democracy a ngah khawh nak hnga cawlcangtu a simi Ko Kyaw Min Yu @ Ko Jimmy le Ko Phyo Zeya Thaw telh in minung 4 cu phungning tein kan zulhter mi hna si i anmah pawl cu voi tampi Death Penalty ( thihding sualphawtnak) pek an phu tiah SAC biachimnak nawl ngeitu Major-General Zaw Min Htun nih Press Conference ah a chim.

Myanmar’s Brigadier-General Zaw Min Tun answers questions from journalists during a press conference at the Defense Service Museum in Naypyidaw on August 23, 2019. (Photo by STR / AFP)

88 siahngakchia hruaitu Ko Jimmy le NLD palai hlun Ko Phyo Zeya Thaw nawlpeknak ruangah a thimi, sualnak ngei lo mipi le temhinnak a tuarmi aiawh in biaceih zung nih a dotdot in bia a ceih hna i Death Penalty (Thihding sualphawtnak) pek an si bantuk in biaceih zung ah biaalnak nawl le zangfah halnak nawl le chungkhar he tonnak nawl an ngei tiah a chim.

Zaw Min Htun nih ” An buarmi sualnak hi adang thihnak nawl chuahmi pawl he tahchunh ahcun voi tampi thihter ding an si. Mah kong hi pumpak huatnak ruangah tuahmi a si lo. Mipi tampi nih tlukruannak an hmuh khawh nak hnga le mipi le rampi karlak ah tlukruannak a um khawh nak hnga kan tuah a si” tiah a chim.

Hramhram in uknak a latu SAC nih 2021 February 1 thok in duhlonak a langhter mi hngakchia telh in minung 1900 leng a thah cang i an luh ah tinh hramhram in a kah hna.SAC nih a thahmi minung 4 an ruak cu atutiang an chungkhar nih hmuh khawh an ngah lo bantuk in zeitik ni dah an thah hna ti zong an thei kho lo.

A thimi pawl an ruak kong he pehtlai in chungkhar sinah kan pek lomi hna hi thongbawi pawl nih tuahnak nawl an ngeih ning tein kan kalpi mi a si tiah a chim fawn.Atu bantuk Democracy a lennak hnga a cawlcangtu thah an sinak kong cungah ramchung dothlennak phu tampi, ASEAN telh in vawlei cung ramngan hna nih duhlonak an langhter. Editor The Chinland Post

Demosoe PDF Nih SAC Ralkap 3 An Kah Thah Hna.Ningcang loin thah a tongmi ram pasalțha minung 4 caah Demoso peng, DawNganKha ( ဒေါငံခါး) khua ah umhmun a khuarmi SAC ralkap hna cu teirul cham in kan kah hna i SAC ralkap 3 an thi tiah – Demoso ( DMO – Local PDF ) nih cathanh an chuah.

SAC ralkap nih Democracy pasalțha 4 a si mi Ko Jimmy, Ko Phyo Zeya Thaw, Ko Aung Thura Zaw, Ko Hla Myo Aung hna cu hri thlai in an thah mi hna hi Demosoe DMO – Local PDF nih kan cohlang kho lo i nuhrin covo a buartu SAC ralkap hna i an tuahser nak cu kan doh, fak piin sual kan phawt hna tiah an langhter.

Cu caah Kayah ramkulh, Demosoe peng DawNganKha khua mizapi hna i an inn ah umhmun a khuarmi SAC ralkap hna cu miz Demosoe Local PDF, PDF Battalion 1102 le Battalion 1106 hna i bawm in July 26 zanlei Sml 3:20 hrawngah suimilam pakhat chung hrawng kan va kah hna.

Kahdohnak ah SAC ralkap pathum an thi i hliam a tuarmi an tam tiah an langhter.DMO- Local PDF lei in ralkap 2 hliam an tuar tiah cathanh chungah an langhter. Crd:TCP

Sagaing Khua Ah Pyosawhti Citmi Motor Cu PDF Nih An Kah Caah Pyosawhti 4 An Tlaih Hna.July 27, 2022 ,Sagaing Khua Ah Pyosawhti Citmi Motor Cu PDF Nih An Kah Caah Pyosawhti 4 An Tlaih Hna.Sagaing ramṭhen, Sagaing peng Cuaipung khua in SAC ralkap kuttang Pyosawhti hruaitu chang Aung Zaw Oo aa citmi motor cu PDF nih July 26 chun sml 11:00 hrawng ah an kah hna. Tualchung mi 10 an thlah ṭhan hna i, Pyosawhti 4 kan tlaih hna tiah Sagaing peng thawng fianhternak phu sinin theih a si.

Pyosawhti hruaitu chang Cu Sagaing khua in Cuaipung khua lei a kal lio Sagaing pengkomh Battalion 2, companny(C4)4 le C4 a kuttang (2) hna nih an kah hna, tiah theih.“July 26 chun hnu sml 12:30 hrawng ah Sagaing in Cuaipung ah a kalmi Pyosawhti phu an i citmi motor cu lam hruang in an kah hna i, an tlaih hna. Aa citmi cu 14 hrawng an si,” tiah sagaing ramṭhen, thawngpang fianternak ṭuanvo ngeitu nih a chim. Crd:TCP

Matupi Khua Ah SAC Ralkap Nih Khual Cazin An Chek I, A ruang Um Loin Nuva An Tlaih Hna.July 27, 2022,Matupi Khua Ah SAC Ralkap Nih Khual Cazin An Chek I, A ruang Um Loin Nuva An Tlaih Hna.Chin ramkulh, Matupi khua ah SAC ralkap pawl nih July 25 zan ah khual cazin an chek i, Matupi khua LawngVan sang um Pu Ngai Uk le a nupi Pi Puu Zin Nia cu an tlaih hna, tiah tualchung mi hna sinin theih a si.

SAC ralkap pawl nih Pu Ngai Uk an tlaih dih a thaizing July 26 zinglei ah a nupi cu an tlaih ṭhan. Anmah ralkap an camp(ဗျူဟာ) lei ah an kalpi hna, tiah Matupi ummi pakhat nih a chim.“Thimnak(election) ding ah a hlankan in timhtuahnak ca ah tiah Matupi khua chung cu an cul i, khual cazin an chek. July 25 zan ah LawngVan sang khual cazin an chek i, Pu Ngai Uk cu a ruang um loin an tlaih. A thaizing ah a nupi zong an rak tlaih ve. Pu Ngai Uk cu motor khal a si, zei ruang ah dah an tlaih ti cu kan hngal lo,” tiah Matupi ummi pakhat nih a chim.

Matupi ah SAC ralkap nih tlaihkhihnak an tuah lengmang caah tualchung mi lakah ṭihphannak a tam tiah theih a si.Matupi, LayMyoChaung(လေမျိုချောင်း) lei ah motor lam remh ding in a kalmi SAC ralkap pawl cu CDF-Matupi nih July 25 ah kan kah hna i, SAC ralkap 5 an thi, 4 hliamhma an pu tiah CDF-Matupi nih cathanh an chuah. Crd:TCP

Sui Fangkhat Tlai Ah Ks Sing 23 A Phan! US Dollar Khat Ah Kyats 2700!July 26, 2022,Sui Fangkhat Tlai Ah Ks Sing 23 A Phan! US Dollar Khat Ah Kyats 2700!: US dollar man a kai tuk caah ramchung sui man zong a kai ngai, tiah theih a si. US dollar khat ah Myanmar phaisa Ks. 2700 tiang a phan i, fangkhat tlai sui man cu Ks. sing 23 tiang a phan, tiah theih a si. Yangon Region Gold Entrepreneurs Association(YGEA), Yangon ramṭhen sui zuartu phu hna nih an langhtermi sui man cu fangkhat tlai ah Ks. 2,060,000 a si nain, a leng an zuarnak ah cun ks. 2,340,000 tiang a phan, tiah theih a si.

Atu lio sui man cu fangkhat tlai ah Ks. 2,340,000 a si i, dawr khat le dawr khat cu an man an i khat cio hna lo,” tiah sui dawr ngeitu pakhat nih a chim. YGEA chairman U Myo Myint nih cun atu bantuk in sui man le dollar man a kai tukmi hi ramkhel lei buainak ruangah ning cang lo in thil a can dih caah a si, tiah a chim.

Sui zuartu hna nih sui man cu dollar khat man Ks. 2400/2500 in zuar le cawk a si. Ramkip ah sui man a tla nain Myanmar ramchung sui man cu a kai caah YGEA chungtel sui dawr ngeitu hna nih sui man ningcang lo in zuar le cawk a um ahcun YGEA sin ah theihternak tuah khawh a si, tiah theihternak an tuah.

Sui zuartu hna nih sui man ningcang lo in an ṭumkaiter ruangah ah chekhlatnak tuah an si lai, tiah theih a si. Central bank nih US dollar khat man ah Ks. 1850 in rikhiahnak a tuah hnu ah, dollar man cu ningcang lo in a kai i, dollar khat ah Ks. 2700 tiang a phanh caah sui man zong rikhiahmi man nakin tam tuk a kai, tiah theih a si. Crd:TCP

Sagaing Ramṭhen Chaung U Ah Bomb Puahnak In SAC Ralkap 22 An Thi!July 26, 2022,Sagaing Ramṭhen Chaung U Ah Bomb Puahnak In SAC Ralkap 22 An Thi!: Sagaing ramṭhen Northwest Headquarters in Myinmu lei ah kal mi SAC ralkap mawṭaw hna cu Chaung U peng, Nga Yan(ငါးယှန်) khua nichuah lei an phak ah tualchung PDF nih bomb an puahhnawh hna i SAC ralkap 22 an thih lengah hliam tuar zong an um, tiah theih a si.

Cu bomb puahnak cu nizaan zing Sml 11 hrawng ah Farmer Revolution Force (Chaung U) le Myaung Revolution Army battallion 5 i bawm in an tuah mi a si, tiah FRF CHU in ṭuanvo ngeitu nih a chim.“SAC ralkap hna cu an camp in mawṭaw 22 he an ra i Chaung U certual ah mi an i thleng. Cu mawṭaw 16 in ralkap 50 hrawng cu an ra i bomb lung 2 in kan puah hna,” tiah FRF CHU in ṭuanvo ngeitu pakhat nih a chim. SAC ralkap lei nih hriamngan in ruahdamh in an kah ve hna, tiah theih a si.

Bomb a puah mi mawṭaw cu a rawk i, a thi mi ralkap ruak hna cu an hawile nih an kalpi hna, tiah theih a si. SAC ralkap bomb an puah an tonnak cu Monywa-Mandalay highway ah a si i SAC ralkap nih ralkap thazaang chapnak lam ah an hman bik mi lam a si, tiah theih a si. Crd:TCP

SAC Nih Insein Thonginn Ah Ramkhel Lei Thongtla Thih-dan An Pekmi 3 Cu An Thah Ṭhan Hna!July 26, 2022 ,SAC Nih Insein Thonginn Ah Ramkhel Lei Thongtla Thih-dan An Pekmi 3 Cu An Thah Ṭhan Hna!: Insein thonginn thongbawi hna nih ramkhel lei thongtla thih-dan an pekmi 3 cu an thah ṭhan hna, tiah thong a rak tla bal mi U Htun Kyi nih Delta News Agency ah a chim. “Atu ahhin thih-dan pekmi ramkhel lei thongtla za renglo an um i, hmailei ah minung zeizat dah atu bantuk in thah an si ṭhan lai theih a si rih lo. Thong chung ummi hna sin in thawngpang hlatnak kan tuah i, minung 3 an thah ṭhan hna, tiah kan theih,” ti in ramkhel ruangah thong a rak tla bal mi U Htun Kyi nih cun a chim.

July 23, ah U Jimmy, U Phyo Zayar Thaw, Ko Hlah Myo Aung le Ko Aung Thura Zaw hna cu thonginn nawlngeitu hna nih an thah hna hnu ah, ramkhel lei thongtla thih-dan pekmi minung 3 cu an thah ṭhan hna, tiah a chim chap.

Atu bantuk in ramkhel lei thong tla hna cung ah thih-dan pek in an thah hna ruangah July 25 ahkhan hmunkip um thong tla hna nih duhlonak an langhter i, thonginn nawlngeitu hna nih an tukvelh hna i, an hrem hna caah cheukhat thongtla hna cu faak ngai in hliamhma an tuar, tiah U Htun Kyi nih cun a chim. AAPP nih cazin an langhter ning ah thong tla mi hna chung in thih-dan pekmi dihlak cu minung 113 an si, tiah an langhter. Crd:TCP

 

Author: admin

Leave a Reply

Your email address will not be published. Required fields are marked *