Ralhraang ralkap Urkaang mi Ṭal khua an thianfai Inn zate deuh thaw a kang thluh mi Ţal Khua Le Mipi Tuarnak

Ralhraang ralkap Urkaang mi Ṭaal khua cu tuni July 20 ah kiangkap khuami pawl bawmnak thawn an thianfai. Falam-Hakha zinpi ih um Ṭaal khua hi ralhraang ralkap in ṭum 3 an urkaang zo ih, atu ah inn 7 lawng a tang. Kan dung kum 2021, October thla ah voihnih, tu kum 2022, July thla ah voikhat ti`n voi 3 an urkaang ih inn 29 a kaang fai a si.

Taal khua ah nasa tein vei 7 rori doawknak a um zo. Chin ralkap le Min Aung Hlaing ralhrang pawl doawknak hmunpi pakhat a si lawng si loin Falam peng ih doawk suaknak tamnak bik hmun a si fawn.

A veikhat doawknak cu 2021 July thla thok hrawngah a si ih, cumi tum ah ralhrang 150 lenglo khua sung ah rawl an suangih inn zuat ar le ei thei thrilri tam zet an laksak. Cu mi theh hnu rei lo te, July thla cem thotho ah ralhrang rual 200 lai an ra kir sal ih Taal ram ah nasa tein doawknak a um.

Himi tum khalah ralhrang 200 cu khua sungah zan 6 an caam ih cumi ah inn zuat ar, vok, caw a taangmi um lo tiang in an that theh. Mipi pawl cu mangbang vansang in an um ih an khawruah a har ngaingai.

October 2021 ah Kalay in ralhrang mawtaw 50 leng lai le minung 500 zik an ra so lala ih Taal ram sungah nasaten an kapawk ruangah October 15 – 20 tiang Taal khua ah an riak. Himi tum ah inn 3 an urkang thluh. Cule ralhraang rual an ra kir lam ah nasa tein an do aw sal ih inn 8 an ur lala.

Cutin kum a liam ih 2022 sung kan thlen hnu cun khuasung khal hngaktu mino malte lawng an um. 2022 March thla sungah mawṭaw 27 le minung 200 rual cu Hakha lam ah an hong so lala ih Taal khua le ram sung ah nasa tein an fehlam ankir lam doawknak a um. Cule tu tum July thla an kahawk ruangah Ralhrang in inn 29 an uarkang lala. A hmaisa an urkang mi pawl thawn inn 40 a si zo.

Atu ah inn, biakinn le tlawnginn tel in inn 8 lawng a tang thlang. Falam peng sungah ralhrang ruangih khua tio hmaisabik dinhmun an si ding. Khua lam kir ding cun inn cem theh fawn, khawpi sung um ding le inn man, ei in man thawn a si tikah mipi pawl cu thinbang le vansang in an um thlang. Chin mi ramkip le hmuntinkim um mi thlacamnak thawn tanpi an tul zet.

Salai Van Bawi Lian/Taal ih simmi a si. Taal mipi hrang thlacamnak le ti thei tawk thilri sumpai in bawm cio hram uhsi – Salai Thawngpi/ Ramthlo

Author: admin

Leave a Reply

Your email address will not be published. Required fields are marked *