Paletwa khuaah Diesel a khaihlak avangin electric pek chhuahna tihtawp a ni

Chin state chhim lam Paletwa khuaah Diesel a khaihlak avangina khaw puma current pek chhuah thin chu ni 5 chuang pek theih a nih tawh loh thu hriat a ni.

Paletwa tualchhung mi pakhat chuan, “Kar hmasa Thawhtan zan atangin electric eng kan nei tawh lo, ni 4/5 vel a ni tawh, Diesel awm loh vang an tia. He lamah diesel lakluh theih a ni lo an tia, Chauhtaw lam atanga lak chu hetah a rawn lut thei lo a ni,” tiin a sawi.

Paletwa township lamah sorkar current line a la thleng ve lo a, Electric department lamin Diesel hmangin current an pe chhuak thin a.

Mahse, tun hnaiah Rakhine state Chauhtaw lam atangin diesel/petrol oil telin bungraw lut turte chu military council sipai lamin an khap bet tlat a; chuvangin Paletwa-ah diesel khaihlakin tun dinhmun an thleng ta a ni.

Paletwa khuaah current chu thuneihna lak hma chuan, zan khatah darkar 4 zeng pek thin a ni a, kum 2021 February ni 1-a sipaiin thuneihna an lak hnuah ni khat dang zelin, zan khatah darkar 4 pek a ni a, June ni 27 atanga diesel a khaihlak takah chuan current pek hna chu tihtawp a ni a.

Paletwa khaw mi pakhat chuan, “Zan dar 6 atanga 11 thleng chu kan nei thin a, a tukah a rawn kal lova, ni khat dan zelah a ni thin a. Tunah chuan ni thlak inkar thlak pawh a ni tawh lo. In thenkhatah chuan solar leh battery hmangin an inchhi eng a, thenkhatin mawmbati an chhi a, chutiang chuan khaw pumah battery nei inte chu a eng a, a nei lote chu an thim deuh vek a ni mai,” tiin a sawi.

Chin state-a mipui chen tam berna township, Paletwa township hian diesel/petrol telin ei tur, chakkhai chi hrang hrang chu Rakhine state Chauhtaw-Paletwa kawng atangin a la lut ber thin a.

Tunah chuan Military council lamin Kaladan tuipui dunga lawng tlan a khuahkhirh tak avangin, Paletwa khuaah diesel/petrol man bakah ei leh in mante a to chhoh zel thu hriat a ni.

 

Author: admin

Leave a Reply

Your email address will not be published. Required fields are marked *