Khawsung lak operation nei dingin NUG Northern Regional Command Headquarters-in Commando special force a din

Military council pawl a hrampi in phawi suak thluh dingin le khaw sung lak operation nei dingin Commando Special Force din a si thu National Unity Government (NUG) Defense Ministry, Northern Regional Command Headquarters cun thusuah a tuah a si.

NUG People Defense Froce NUG Northern Regional Command Headquarters, brigade 7, battlion 703-a Second Commander Colonel Than Zin Aung cun, “Khua ur ih, thil ruk leh mipi um men thattu military council a a hrampi cawpin phawi suak dingin, kanni battalion cun Commando special force kan din ih. Hi battalion hin military council ralkap camp, khaw sung lak leh special operation hna an tuan ding a si,” tiin a sim.

Tuhnu reiloteah battalion lamin Ministry of Information fehtlangin an thil ruahman dante tarlan a si ding ih. Thuneihnak laktu ralkap pawlin  mipi pawl tharum hmangih pal bet leh thah hna a tuan ring ring ah mipi lamin mai nunkhaw suak nak ding ih kilhim thei nak (rights) hmangin mipi defensive war cu beih rero lai a si ih. May ni 7 ih sin June ni 6 thleng, thla khat sungin military council lamah mi 2000 tha an thi a si tiin NUG cun thusuah a tuah.

Cumi thusuah ih a tarlan mi cu nikum 2021 June ni 1 ih sin tu kum May ni 17 tiang record lak khawm mi ih sin puan zar a si ih; a si nan Myanmar ram pumah dokahnak ih ralkap thi leh hliam pawl thuhla fiangfai cu military council lamin puanzarna a nei ve lo thung a si.

Myanmar ram pumah mipi pawlin ralkap thuneihnak leh lal hrawtnak cu Myanmar leilung ih sin tihtawp ih, Federal democracy tun din theih nak ralmuang takih kawngzawhnak pawl cu state leh region dang dangah fehpi a si.

NUG cozah din a si ih sin kum 1 sungin mipi kilhimtu pawl (PDF) battalion 257 din a si zo ih, township based mipi kilhimtu pawl (VDF) pawl khal township 25-ah mumal takin din theih a si thu theih a si ih.

Cutih rualin PDF pawl thawn pehpar nak  Local PDF te, Urban Guerilla pawl 500 luan cu umzia nei takin do awknak  hmachhawn ho thei dingin timtua fel a si zo le cu ai ih tha sawn Chain of Command nei vivo ih, kan ral pawl nuai chimit ih, kan hneh thluh thei dingin ralring ten rak um a pawi thu   NUG cun a thusuahah a tarlang bawk a si

 

Author: admin

Leave a Reply

Your email address will not be published.