Dr Lalmalsawma, Vawk hri, thi vawk vulhtute rumna.

Lengpuiah khuan huan te neiin thlai hmun te, thei hmun te kan thiam ang angin kan siam ve a. Kuhva te pawh kan phun ve bawk a. Nun a tihlim ṭhin hle. Kan huanah hian Ar leh Kel te kan vulh ve a.

Vawk te pawh theihtawpin kan han vulh ve a. Mahni in chawmna khawp thlai leh sa lam thar na hian hmun a lo ngai zau lo viau tih te, Kuthnathawktute leh ran vulhtute thawhrim zia, harsatna leh buaina an paltlang hnem zia te hi ngaihnawm tak, ngaihnawm lo thei tak niin ka hria.

Nikum ‘ber’ thla chho ah khan ASF (African Swine Fever) avangin kan vawk te kan chan fai vek mai a. Pathian zarah kan tluang tawh em ang chu maw tiin nikum november atang khan bul ṭan chho leh kha a nia. Vawk hrileng laka kan himna turin theihtawpin kan han bei ngial naa, kan tihtheih piah lam Vawk hri leng vanga vawk thi chuan min nuai nawn leh mek a, vawk ina duat taka kan vulh vawk an lo thi hmuh tur awm leh phuk phuk mai chu sawi tur a vang duh khawp mai. Lengpui leh a chheh vel mai ni lo, Mizoram hmun hrang hranga vawk vulhtute mangan tur zia ka ngaihtuah hian rilru a kal thui a ni. Pawisa vaibelchhe tel tak meuh vawk vulhtute hian an chan leh mek a ni.

June ni 1 thleng khan Mizoramah ASF vangin vawk 3898 zet an thi tawh a, vawk suat 3276 zet a tling tawh bawk. ASF hian khawpui chhung veng leh khua 54 chu a ti buai mek a ni. June ni 1 leh vawiin june ni 14 inkarah hian engzat tak thih belh leh ang maw.

Tun kara Mizorama lo zin Union Minister for Fisheries, Animal Husbandry & Dairying changtu Minister Parshottam Rupala’n ASF avanga Mizoram vawk vulhtute harsatna sut kian nan AH & Vety College, Selesih chuan laboratory tha a neih a ngai tiin, proposal ziak turin a hrilh a. ASF vaccine pawh rampawn atanga a ngaihven sak tur thu a sawi te hi a tak a va nghahhlelh awm tak.

Mizorama kan Vety Minister in ASF chu State Disaster a puang turin Chief Ministerah an thlen a, CM in a pawmpui tawh a, Notification nghah mek a nih thu leh State Disaster a puan anih chuan ASF vanga vawk chan ten zangnadawmna an dawng thei dawn tih te, African Swine Fever (ASF) vanga kum 2021 chhunga vawk suat neitute hnena zangnadawmna pek tur zinga zatve cheng vbch 5, nuai 84, sing 9, sang 7 Finance-a an dil mek tih te, Vawk suat nilo, ASF avanga vawk thi te zangnadawmna tur chu Planning & Programme Implementation Department ah sum an dil a, Planning lamin project-ah an dah tih a sawi te hi Vawk vulhtu te tan a tak chang thuai se ka tihpui takzet.

Mizoram sorkar chuan kum 2021-a ASF avanga vawk suat neitute tan scheme awmsa hnuaiah sorkar laipuia Ministry of Fisheries, Animal Husbandry & Dairying ah zangnadawmna cheng vbch 11 nuaih 69, sing 9, sang 4414 a dil niin ka hria a, scheme-ah hian sorkar laipui leh Mizoram sorkarin zangnadawmna pek tur chu a zatve 50-50 in an intum sem tur a ni.

Ka hriat danin sorkar laipui hian Mizoram sorkar hnenah kumin march ni 22 khan ASF vanga vawk suat neitute zangnadawmna tur atanga a zatve cheng vbch 5, nuaih 84, sing 9 sang 7 a rawn pe tawh thung niin ka hria a. Hengte hi eng angin nge vawkvulhtute hnen a thlen tih te hi ka chhut a, he harsatna Mizoram vawk vulhtuten an tawhna rei tawh ang hu hian an harsatna sutkian leh tanpuina kawngah kan hnufum deuh lutuk hi chu a zia lo ngawt mai.

Hetiang ka ngaihtuah hian vawk vulhtu, thahnemngai taka vulha rim taka thawk a, nakina hmalam hun hlimawm tak suang tuahna nena thawkte ka khawngaih thin hle. Han in puih dan a vang viau mai si. Mizorama vawk vulhtuten hun harsa an tawh hi a kum khat chuang a ni ta a. Sorkar atanga puihna eng ang nge an hmuh tihte ka ngaihtuah a. An dinhmun hi a khirhin a harsa tak meuhin ka hria. Ka rilruah heng farmer te tana Safety Net siamsak a tul zia hi nikum khan ka experience ṭan ve a. Thusawi ringawt ni lo, thusawi ataka chantir hi hmasawn tura kan mamawh lai tak a ni si.

 

Author: admin

Leave a Reply

Your email address will not be published.