Chin Ramkulh, Thantlang Ih Khua Mawitertu Thantlang Baptist Biakinnpi Cu SAC Ralhrang In June ni 9, 2022, Zaanlam Suimilam 4:30 Hrawngah Meisa Thawn An Urkang Lai Boruak.

TBC Biakinn Saknak Tuanbia Tawi, 1910 ah, Thantlang ah zumtu an rak um cang. Biakinn an ngeih lo caah inn khat hnu inn khat ah an ipum. Chungkhar tling in zumtu a silo mi nih an rak sianh hna lo.

Kum 7 a rauh hnu, 1917 ah Saihrem tualbawk in Biakinn hmasabik cu an rak sak. Hi lio ahhin Laitlang pumpi civui zong an rak tuah i khual 360 an rak si. Tio ral lei in Thingsai khuami zong tam ngai an rak tlung.

Zumtu an hun karh deuh i inn 20 tluk an si cang. Cucaah 1930 ah, khua lai deuh ah Biakinn cu an thial i tualbawk thiamthiam in an sak. Cucu a voihnihnak a si. Zumtu an tam deuh ngai pinah an hruaitu Pu Tei Dun hi thingah thiammi a si caah cuka hmun thiamthiam ah cun, 1942 ah pe 30×15 in, thingah inn in an rak sak. Cucu voithumnak a si.

A voi 4nk an sak ah cun, Rev. Hai Mang Pastor ah an lak cang. Khualu hauka pawngah thingah inn in pe 30×20, ngaidi cih in, 1956 ah an rak sak than. Kum 1963 ah Biakinn cu Khua Thar ah an thial i atu Biakinn hmun ahhin pe 50×30, canphio cih in an rak sak. Minung an i tlum tilo pinah a thin pah cang caah 1976 Pur 27, CC meeting ah, ‘Biakinn cu pe 100×50 in, Tlakrawh inn in sak siseh’ tiah bia an chah.

Kum 1977 ah an thawk colh. 1981 Hniang 7 ah Rev. Hai Mang le Pu Chum Hnin nih innkil lung an chiah. Khrihfabu thawhmi Ks. 16,439 nih a zatlo caah pumpak nih a hlei in an thawh pinah HBC le TABC ram chung zong nih an rak bawmh hna i MBC le MCC nih tangka an rak coih hna. 1985 Vaupi 14 ah ZBC GS Rev. Pau Khan En thlacamnak le MBC GS Rev. Zau Zaw innka hunnak in Pathian sin pekchanhnak an rak tuah. Biakinn saknak ah Ks. 246,929 an rak dih.

Thantlang cu khuapi a si bantuk in minung an karh chin lengmang caah chungtel zong an karh chin ve. Biakinn nih a tlum than ti hna lo caah pe 25 dot hnih in a hnulei ah peh than a si. Cucaah pe 125×50 a si cang. (TBC Tuanbia Cauk chungah lakmi a si). Cucu 2022 Pur 9, zanlei Sml. 4:30 hrawngah ralhrang nih an khangh. Kum 2020 lio ah khan inn 627, chungtel 2,953 kan si. Ref: TBC Facebook Page

 

Author: admin

Leave a Reply

Your email address will not be published. Required fields are marked *