ZRA pawl hi Uico SAC ralhrang military council kut leh ke an si  Zomi Revolutionary Army is Puppet fighter of Burma Army.

Zokhawthar ral lehlam, Haimual khuaah ZOMI REVOLUTIONARY ARMY ( ZRA ) te chu Burma Military Council Sipai ten thurual puiin CDF/ PDF mipui venghimtu sipaite chu nimin 29th January chawhnu dar 2 vel aṭang khan hun engemaw chen an inkap a, bomb vawi 3 vel a puak a, Zokhawthar ral leh lam Khawmawi (Tiau) khua aṭangin mi ṭhahnem tak Mizoram lamah an rawn tlan lut mek a, Haimual khua a mite pawh Ṭiau lui kam, Zokhawthar khawdai-ah raltlan in nizan-ah an inzar pharh mek niin thu dawnna chuan a sawi” tiin chanchin duhawm vak lo chu ka chhiar a.

Ka beng verh em em zawk chu ZRA (Zomi Revolution Army) ten sual sipai Military council lam tang an nih daihna zawk chu a ni.ZOMI hi tute nge tih pawh ka rilru-ah zawhna lian tak a rawn awm nghal a ni.

Zohnahthlak Zofate te hi kan awmna hmun hrang hrangah hming hran hran a koh kan lo ni tawh thin a.Hengtianga kan hnam hming min kohna pawh hi keimahni nihna ni lovin hnam dangho min kohna a ni hial zawk ani.

Manipur-ah “KUKI” tia hriat kan nia, Mizoramah “LUSHAI” tia hriat kan ni thin bawk a, Myanmar ah chuan “CHIN” tia hriat kan ni leh bawk. Lushai tih chu British ho in Mizorama chengte kan vaia vaihmaa min kohna a ni a ,keini chuan Mizo kan inti vek a ni.

Keimah ni nihna diktak zawk chu Mizo hi a ni a. “Zomi” tih leh “Mizo” tih hi thumal pakhat “Zo” atanga lak ania. Zomi tih hmangtu tena an huam tir ang chiah chu Mizo tih hmangtu te pawn an huam tir ve a.A danglamna chu thuhma belh leh thuhnu belh vang mai ani. “Zo” hi thuhma (prefix) a kan hman chuan “Zomi” a lo nia. “Mi” thuhma belh(prefix) a kan hman ve thung chuan Mizo a ni leh mai a.

ZOMI hi Mizo ai chuan grammartically in a dik deuh zawk niin literature lama hlathu lam tuimi ten an sawi thin a.A chhan chu Zofa, Zoram tite in ” Zo” hi thuhma belh ah kan hmanga Fazo , Ramzo tiin kan hmang ngai meuh lo.Zofa leh Zoram hi Fazo leh Ramzo aia a dik zawk a nih ngai chuan ZOMI pawh a dik zawk lohna a awm lo an ti thin. Chubakah ZOMI tih thumal hi hman atangin Mizo aiin an hmang hmasa zawk ti tute an awm bawk.Mizo emaw Zomi emaw pawh chu hming hran in vuah mah ila ,thlatu thuhmun kan unaute a ni tiin ka lo thlamuan pui thin.

Tuna ka sawi tum zawk chu “Zomi “a hnam ngawr ngawr mipui vantlang chungchang a ni lova, ralthuam keng ZOMI REVOLUTIONARY ARMY (ZRA) chungchang zawk a ni.

ZRA hi Zomi Revolutionary Organisation (ZRO ) in a din Armed Group a ni a, ZRO hi 1993 April thlaa din an ni a, tichuan India ram Manipur State a Churachanpur hmuna Headquarters nei a ni.Manipur State chhungah Kuki tia hriat zofa hnam chikhat leh kan unau Paite hnam inkarah intihthiamlohna lian tak a chhuah hnu khan ZOMI REVOLUTIONARY ARMY tiin India hel pawl pakhat angin 1997 khan ZRA chu a rawn piang chhuak ta a, an hotupa ber hi Pu Thanglianpau Guite a ni.An din chhan chu an huam chhunga Zomi te tan a ni a,Zogam dina hnam anga dinchhuah an tum a ni awm e. A tir chuan India sorkar laipui dotu hel pawl pakhat tia hriat a ni a, 2005 kum khan India sorkar laipui nen remna thuthlung inkahhai an puan hnuah chuan Assam Rifles ho ang mai in India ram leh Myanmar inkar ramri hrulah awm hmun khuar in an chetla vel thin.

ZRA hi Meitei hel pawl te nen inthlung nghet tlatin Churachanpur-ah awm hmun khuar in Chin State hmar lam Tedim leh Tonzan khua chhehvelah an rawn kal fo a, Dan lo taka opium te chu khawtual mite chin luih tirin ruihhlo a sumdawnna an kal pui thin a ni. Tin ,Meitei hel pawl thenkhat leh ZRA te hi Burma Military Regime te nen vawi duai lo an lo thawk ho tawh a.

Tamu PDF phei chuan a huam chhungah Burma sipai thawhpui Meitei hel pawlte chu an um darh fo tawh a ni.Meitei hel pawl nen an thawh ho mai piah lamah Chin State leh Sagaing Region lam control-tu Burma Sipai North Western Command hnuaia Regional Operation commander chuan USDP mi leh sa te kal tlangin Naga hel leh ZRA hruaitute a be pawp a Chin State leh Sagaing Region chhunga PDF te kap turin thurual puiah a sawm a,Naga hel ho erawh chuan an pawm pui lem lo a ni.Burma Military Council sipai te chuan ကပစ ( Kah-pah-Sah) factory atanga an siam 15 MA-1 Assault rifles leh ralthuam dang tha hnem tak pawh ZRA te hman atan an pek thu Chindwin Media chuan a tar lang bawk a ni.

Tunhnai lawka Taingen khaw bula jet fighter in bomb a thlak a, Combat Helicopter ten PDF /CDF-te an rawn kah chiam tum pawh khan Burma Military Council sipai te zingah ZRA pawh an lo in zep reng a ni tih hriat a ni.

Myanmar ram hmun dang ang thoin , Tedim leh Tonzan Township chhunga ram leh hnam tana inpe thalai rualte chuan sipai thuneihna atchilh firfiakte dolet tur leh Military rule tihbo tumin theihtawp chhuaha democracy lamtluang zawh an lo tum a , PDF (Zoland) leh PDF (Hualngo ram ) an din ve a ni.

Tin, Chindwin Media in a tarlan dan chuan ZRA Eastern Command hian ni 22/1/2021 leh 16/6/2021 khan Chin State hmar lama mipui sipai pawl PDF (Zoland) Training-na camp chu tum hnih meuh rawn ti buaiin an lo tih chhiat sak tawh a ni.

Zomi tih leh Mizo tih hi khawi nge dik zawk tih hriat thiam a har hle.Amaherawhchu History leh Grammar atanga kan han chhui chuan Zomi tih hi a dik deuh zawk emaw ni chu aw a tih theih.Zohnahthlak te hian Zomi tih thumal hi an lo hmang hmasa zawk niin a lang bawk.Mizo tih chu hla thu (Poetical Words) a Zomi sawina niin historian te chuan an sawi.

Zorama chengte hi Zomi ni awm tak chu kan ni,Mi ah Zo a chen theih lohva Zo ah Mi kan chen zawk avangin.Zo tih hi a ram sawina a ni a,Mi kan tih ve thung chuan Mihring sawina.Mi ram hnam hming put dan te pawh han ngaih tuah ila, ram hming hi an dah hmasa.

A thuhrimah kan hla ah leh thil hming ah te pawh Zo hi kan dah hmasa deuh zel si a.Entirnan;”Kan Zotlang ram nuam hi chhawrpial run i iang e” tih te,Zozam,Zoram,Zohnahthlak tite in thuhma belh (prefix) ah kan hmang tho si a.Zomi tih dawna thuhnu belh (suffix) a hman leh daih te chu a awm lo deuh in a hriat.

Mizo hi huam chin in ang, thil thuhmun an ni tih a hriat theih.Zomi in ti ho hian Mizo inti ho hi Zohnahthlak “R“ groupho intih Zomi ve na ah ngaihsak ila.Mizo inti ho pawh in Zomi tih hi Zohnahthlak “G” groupho in tih Mizo ve na ah ngai se.Hming avanga buai mai lovin rilru hmun khat pu thiam ila a tha hle in a rinawm.Unau vek kan ni tho si a.

Zomi/Paite hnam te hi Burma sorkar hun hmasa lamah lehkha thiam leh sipai tang hmasa te an nih vangin Burma ram party leh sorkarah nihna sang tak leh mi pawimawh in lo ni mai thei le.

Amaherawh chu Myanmar rampum huap a Democracy sorkar ti chhetu leh mipuite zalenna tibo va ,mipui te chanvo dik hmuh let leh tura hnam tin chitin ten pheikhai rual taka sual sipai te a zung chawpa kar phawng kan tum lai a ,mahni tanghma chauh hai a,mahni chibil emaw pawl pakhat chauh tana hmasial taka inhai vura unau te lama chengrang in lek hi a tlai hma hian sim vat teh u khai.

 

Author: admin

Leave a Reply

Your email address will not be published.