Mandalay Obo Thonginn Chung Ah Ramkhel Lei Thongtla Hna Le Thonginn Rianṭuantu Hna Kar Buia Nak A Chuah Ruang Ah Thah Nawn Nak A Chuak

A luancia June 5 ahkhan Mandalay Obo(အိုးဘို) thonginn chung ah ramkhel lei thongtla hna le thonginn rianṭuantu hna kar bia-elnak a chuah ruangah thongtla hna cu tukvelh an tong i, cu tukvelhnak ruangah cun thongtla pakhat a nunnak a liam i, 2 hliamhma an tuar, tiah thonginn he pehtlaihnak a ngeimi hna nih an chim. Thongtla hna cu thonginn rianṭuantu minung 50 hrawng nih an tukvelh hna, tiah thonginn riantuantu hna he naihniam in ummi pakhat nih a chim.

 

“Bia-elnak a chuah caah thongtla hna cu inn kharkhumh in thonginn rianṭuantu minung 50 hrawng nih luhhnawh in an tukvelh hna i, bia tam deuh a chimmi cu thonginn bawi sinah an kalpi hna. Thongbawi nih cun pakhat cu nam in a sawh i, atu ah cun thonginn chung si-inn ah an chiah. Cu thil a cangmi kong he pehtlai in thongtla mi 12 cu kharkhumh an si, tukvelhnak ruangah nunnak liammi thongtla cu a min zong theih a si rihlo,” tiah thonginn rianṭuantu hna he naihniam in ummi pakhat nih a chim.

Thonginn chung ah buainak a chuakmi kong he pehtlai in thonginn chimphuannak nawl ngeitu U Khin Shwe nih cun Obo(အိုးဘို) thonginn ah cubantuk thilcang a umlo, cubantuk thiltuah zong a sianh a si fawn lo, tiah RFA ah a chim.

Kayin ramkulh Phaan(ဘားအံ) thonginn ah a luancia June 4 ahkhan ramkhel lei thongtla 2 cu hau lonh in an tlikzaam hnu ah, a taangmi thongtla minung 60 hrawng cu thonginn ṭuanvo ngeitu hna nih an tukvelh hna caah hliam an tuar hna tiah thonginn rianṭuantu hna he naihniam in a ummi nih an chim.

 

 

 

Crd:TCP

Author: admin

Leave a Reply

Your email address will not be published. Required fields are marked *