Kannih Tar Pawl Cu Kha Bantuk Biakinn Tha Ahcun I Pumh Thai Khawh Ti Lai Lo Cu Ka Ti Ah Hme Cu Ka Celh Lo Tuk Cu Aw

Ka hmur cip ko ning ka ti ah ka thinlung phurh a rit chin. A chinchap ah nihin ah TBC biakinn kangh thawng nih a hon chilh chih hoi i phurh hi a rit tuk. Hon sah ahhin phurh tal a zaang deuh la tiah ka hon phuan than ko.
“Saya, kan biakinn kangh cu a faak tuk hme cu. Kannih tar pawl cu kha bantuk biakinn tha ahcun kan i khawm manh ti lai lo. Kan biakiinn pumh, hi tluk i ka ngaih i i pumh thai khawh ti lai lo cu ka ti ah hme cu ka celh lo tuk cu aw” ti i kum 70 reng lo member nih mithli tlak bu i a ka chawnh cu lungthin kuai a zual.


Kan Jerusalem Temple pi ko ngai, zah hngal lo, satan khuahrum nak sual, sual erlet sual, sahraang nak hraang, aan pei ralhrang hna i an kan thah, an kan nawn i khuai bu tthio in an kan tthio hlei i, sualnak ngei lo kan biak runpi ko ngai thisen neh mi an kut par mei i hon ciamh dih ko ngai cu, kan thinlung hi lungdo hmahnai hngerh in a kan hngerh, kan cekne tiang a ka runh. Mi khuachin le run rep lo tang in, member vialte zaang zun thluahmah le hraam lengmang in, ruakinn tah in kan tap, mithi ngaih in kan ngai, thi zun tuar in kan tuar. A ho za domh manh lo kan biakrunpi ciamh ruangmang ko ngai cu, fak hlei khun tuk ai tiin.

Kan rauthla tiang hmanh ah kan i lungsak kho ti lai lo.
Vaca run bang biakinn sak i kan rak kal tti hna le, pi le pu hna zong, caan sau hman manh lai lo an i hngalh ko bu i kan nun lio i biakinn satu kan si ve cu Pathian thluachuah a si an ti i kengkul bu he vai tuhmui le belca an tlaih le paiper i lei vawr an phurh i thirkhenh an phawi ti lio, hngerhte run bang kan hmun chunh, leivawr thiar le concrete toih tti lio, kan ngeih leng tiang biakinn caah tiin chaw kan khawlh le kan pek tti vialte, kha tluk kan teirial tti le lungkhat in kan sak ti lio vialte, rianttuantu cheukhat, hliam le khuai le sizung le siikhan tiang an phanh zong ah Bawipa biakinn ca ahcun a phu ko an rak ti kha mu. Nihin cu, ruhro hna hmanh lungfak le thinhang in an au len ve hrimhrim ko lai.

Khuaivah bu bang a chung tlum loin Pathian kan biak tinak, thlaza kan cam tti le thluachuah kan hal ttinak, Thawngtha tinung kan tlanh tti le kan din tti i thlarau rawl ttha kan i hrawn tti tawnnak, a ram ca i chaw kan pek tti i kan aw ngeih chun chuah in hla thiang kan sak tiinak, Bawipa zanriah kan hman ttinak le chungkhar thar kan ser tawnnak, khual tlung mi leng hna zaa kan chanh hna i miphun ca i bongmal kan sawm ttinak, hringtu nu le pa upat kan pek hna i thluachuah kan ham tawnnak, kan fahniang hna Pathian sin i kan pekchanh tawnnak, zarh fatinte i tuai ur i sunday School kan kai tawnnak, nih le kheh he mino vialte hlaremh kan cawn tinak, Pathian sin i kan thilrit kan tthumh i thazaang thar kan lak tawnnak, Hruaitu vialte Khua kan khan i lai kan rel tinak, riantuantu hna ni fatin te cathiang kan rel, thlaza kan cam i kan tuantinak kan biakinn pipi ko ngai, an ruangpi lawng hei ton te hna ding ruah ah mitthli donh cawk a si lo. 2021 Sep.19, mitthli he kan biakinn ka luh ni kha a donghnak bik ka pal a site lai ti ruah awk ka rak hngal lo. Ka thinglung ah na kaang kho lo kan BIAKINN pi.

An ciamh ni ahkhan a fale hna cu hei um in kan zate tal hei chan manh usihlaw cu kan thinlung tuar a nem deuh ko hnga. Zeitluk tuar le hrum le ai le i lawngvaang khin dek fahniang rual hlam lengmang le temtuar bu khin a hei ciamh ti ruah ah lungthin le nunnak a fak hlei khun tuk hringhran ko.
Khrihfami kan ca ahcun, kan Pathian le kan biakinn then awk a tha lo, kan zumhnak le kan biakinn ai then kho lo, zumtu le biakinn ai then kho lo. Kan biakinn hrawh le khangh piak cu kan Pathian zeirel lo le zomhtaih le nautat si. Kan zumhnak hnon piak le hrawh timh a si. Pastor thah piak cu Zumtu Khrihfa nautat le ci hmih timh a sinak tette an si.

Ton sual a si lo, timh ciammam tein, hramhram in thah le khangh kan si.
Laimi le Khrihfa cu ceunak le lumnak bantuk in then awk a tha lo mi a si. Kan biaknak cihmih timh cu kan miphun cihmih timh zong a si. Biaknak hloh a timtu doh cu Khrihfami le Khrihfa bu rian hrimhrim a si ve. Lung awtawm awk a um lo.Kan pastor, Pastor Cung Biak Hum le kan biakinn a simi TABC, TBC, JMBC, TCBC, UPC, AG, COTR, Holiness, SDA, PCM, GBC, Methodist, EFCM, MEC biakinn vialte hna, Nan phu hlam dih cicek a si caan a phan ko lai. Nan ca nunnak petu thlarau hna hekhan rak i pum tti ulaw, nan tuarnak kha kan biak Pathian rak chim in a tuan cuahmah lio mi hna tainak caah hin khup bil in rak nawl rih ko u mu. Bawipa Pathian nih nan phu in hlam cikcek ko hna seh.
Phuhlqm cu keimah ta a si. Keimah nih ka cham te lai (Heb.10:30).

 

 

 

 

 

 

Crd:Neely Laiuk

 

 

 

 

Author: admin

Leave a Reply

Your email address will not be published.