Thailand-ih pawngsual hnua thah tawng Ma Min Min Khai case cu September-ah thutluknak nei ding 

Sangha mana factory-a thawk Myanmar mi Ma Min Min Khai chu nikum November thla khan Thailand ram, Kabinburi township-a Thailand mi pakhatin pawngsualin a hal hlum a. Chu thubuai kal zel chu Kanbinburi court chuan June ni 6-ah police pahnih leh mita hmutu leh huan enkawltu nib awk mipa pakhat chu thu an zawt fiah a. Pawi khawihtu berin a inpuan tak bawk avangin court chuan September ni 13-a thutlukna siam turin thu a titlu ta niin Ukil U Aung Myo Than chuan RFA a hrilh a.

He thubuai atan hian Thailand Myanmar Embassy-a thawk U Aung Ko Zaw leh U Lin Myat ten an buaipui a. Pawikhawihtu Thailand mi chu pawngsual leh tualthah thubuai section 6 hmangin an khing a. Victim Ma Min Min Khai tan Myanmar Embassy-in Thai baht sing 1 an pek bakah zangnadawmna nuai sangkhat dil an tum thu Ma Min Min Khai-i u Ma Mya Mya Aye chuan RFA a hrilh bawk a ni.

Thil thleng dan chu hetiang hi a ni a: Thailand ramah ni 5 chhung bo tawh Myanmar hmeichhe nula ruang chu hmuh a ni a, chu nula chu Thailand mi mipa pakhatin, a pawngsuala a tih hlum thu a puang tawh a; a inpuanna chhan chu a thah hnua a bikbonaah chu nula thlaruain a rawn tihthaih thin avangin a tawpah a chhungte be pawpin a inpuan tak thu hriat a ni.

Pawngsuala thah tawk kum 21 mi Myin Myin Khai, Thai-Cambodia ramri Pachin Buri district-a Bin Buri township, Cabun khuaa hna thawk, chu ni 5 chhung chin hriat loha a bo hnuah November ni 18, 2021-ah a ruang hmuh a ni a.

Amah pawngsualtu leh thattu kum 27 mi Thai mi Boonlai Buaman chu November ni 18 zanah Kabinburi district police-ten an man a. Chu pa chuanMyin Myin Khai-i pawngsual a tum laiin, ani invenga a lo tan ve tlat vanga a thah tak mai thu chu pawngsual tawk u hmeichhia Daw Mya Mya Aye chuan, “A inpuan dan chuan mi dang tel lovin, amahin a that a ni. Tuiah pawh a paih thla a, a ruang chu dah bo tumin a halral bawk niin police station-ah a inpuang a ni” tiin a sawi.

Pawngsualtu chu a thil sual tih zawh veleh a chhungte awmna Sakayat district-ah ni 3 chhung a bibo a, chutih lai chuan a thah tak mitthi thlarauin a rawn tihthaih thin avangin, a mu thei lova, puithiam hnenah tanpuina dil mah se, a la rawn tihthaih zel tho a. A tawpah a thah tak nula u chu phone-a biak tumin thutlukna a siam niin Bangkok Post chanchinbu November 19 chhuak chuan a tarlang a.

Pawngsualtu chuMyin Myin Khai-i mutna room-ah lutin pawngsual a tum a, mahse hmechhiain a lo beih let avangin, a kut pahnih chu tawnin, a ka chu tape-in a char a, ramhnuai lamah hruaiin, a pawngsual hnuah tuiah a paih thla a, a tukah a ruang chu hmun dangah lain motor tyer nen a hal hnan tak thu pawh hriat a ni.
He pawngsual leh tualthah thubuaiah Daw Mya Mya Aye chuan, “Keini lam chuan keimahni ngeiin hremna pe thei ila chu pek kan duh a. Mahse, chutianga tih theihna kan lo a. Dan a awm a, mahse thi tura a chungthu rel a nih loh chuan keini chu kan lungawi thei lovang,” tiin a sawi a.

Thailand base, Education & Development Foundation-a labour incharge U Min Oo chuan, “Hetiang thil thleng, rang taka man chhuah hi a vang khawp mai. Hetiang hi man theih pawh a ni ngai lo a. Mahse, hna thawhna hmuna awmten an report vek a, a titu ngei pawhin a inpuang bawk a, thlarauin a tihthaih vang pawh a ni bawk a, kan hre chhuak thei mai zawk a ni,” tiin a sawi.

Myin Myin Khaichu Shan state chhim lam, Phekhon township Moe-pye hmun awm, Kayan hnam a ni a, pawngsualtu leh tualthattu Thailand pa chuMyin Myin Khai nen sangha manna len siamna factory-ah an thawk dun a, ani chu electrician a ni. Thil sualtitu chu dan anga hrem a nih theih nan police lamin Kabinburi police station-ah an la kawl reng a.

Myanmar hna thawkte tanpuitu pawl, Aid Alliance Committee (AAC) general inchrage U Ye Min chuan, “Myanmar nula pawngsual bakah rawng taka hal hlumna chu a rapthlak hle a. A titu chu an man tawh niin an sawi a. Mahse engtin chiah nge hremna an pek dawn tih chu kan la hre lo. Zangnadawmna aiin a sual man phut awk hremna an pe ngei tur a ni. Keini AAC lam chuan tanpui chak hle mah ila, tun dinhmunah engmah tih theih ka nei lo a ni,” tiin a sawi a.

AAC pawlin kum 7 liam ta atanga ram pawna Myanmar mi hnathawkte an tanpuina kawnga an chhinchhiah danin, Myanmar hmeichhia pawngsuala thah tawk case chu 3 aia tam a awm tawh a, pawngsual case chauh chu thla khatah case 2/3 a awm deuh ziah a, hremna pek a nih thin dan chu a inang lo hlawm hle a, thenkhat chu kum 3 hnuah chauh thubuai rel fel theih a ni a. A then chu kum 7-12 thleng tantir thin a nih thu, U Ye Min chuan a sawi bawk a ni.

 

Author: admin

Leave a Reply

Your email address will not be published. Required fields are marked *