Thin a na tuk e CNDF Commander in ram sung ram leng ih um mi nu leh pe hnen ih mitthli thawn  lungawi thu sim nak leh thu cah nak a nei mi cun kan laimi mitthli a tlak ter.

Ram sung ram leng ih a um tu ram leh miphun a duh dawtu nu leh pa u le nau a hmaisabik ah CNDF hminin chibai ka lo buk hai kei ka hmin cu salai Hrampi ka si ih CNDF ih tatmaha 1 ih tuan vo nei tu ka si.

Kan nauhakte lai ih sin hmuhsuam phun phun kan tawng ih zarhpizing thleng ding kan nghakhlap theu ih kan nghakhlap theunak san cu buh kan ei thei theu ruangah si,

Cu ti ten kan nu leh pa pawl in harsa zetin  tlawng in rak cawmin in kil khawi ih, harsatnak inhnuai arti pumkhatte khal ei siang lo in fale tlawng cawmnak hrangah tiin in rak cawm ih tlawng in rak ret nan in rak pek dah mi fimthiamnak pawl cu kei tla a hmin in BA english ka si,

Asinan mirang tawng kamkhat hman ka thiam lo mi tawng thei lomi BA english hrawng ka rak zir hlei ah kan ram kawlram dinkhawmtu ah ka tel ve nan mikhual vekin kan um ih harsa tukin kan rak tuar ve tento nan tu sun niah kan ram mal ten a nuam thlang ding tiin kan ruat lai ah ram leh miphun hrangah tiin hinak ka rak ra sannak si.

Tu hiti vekin hna kan tuan tik  ah harsatnak tampi kan tawng nan ahleicein induhdawttu tuni tiangah in tanpitu ram sung si seh ram leng si seh a hleicein ram leng ih um tu pawl nuam zetin nanmah in leh lo ah naninsungsang pawl thawn nan tan ta mi nan sungkhat unau pawl kuat thei in nanmah hrang ruat sela zianghman buai ding um lo nan.

Tu sun tu ni ah nan tan ta mi kan ram nan suahkehnak hmun leh ram nan miphun nan unau pawl nan ruah tuk ruangah tuni tiangah nikhat ah nazi 5-8 hnatuan mi nih kan hrangah a hleiin hna nan rak tuan ih harsatnak tampi tuarin in rak cawm ih sum leh pai thawn siseh thlacamnak thawn khal si seh nan ti theitawkin tha leh zang khal si seh in rak bawm ih, tuni nan fa le pawl hi mi dinhmun kan thleng theinak khal a si.

Neta ah tla nanmah pawl um lo in zianghman kan tuah thei lo nan nih um lo in ral tla kan do thei lo nan mah in pek mi leh nanmah in tuahsak mi hriamhrei pawl hmangin tu niah ral kan do ih raldonakah CNDF nih vawi 50 lenglo kan do mi sungah kan tuah thei mi leh kan ti thei mi mal hman khal se la nanmah ih tha inpeknak ruangah vawi tampiah kan baidawng zet ko nan nanmah kan dunglamah inkilkhawitu in cawmtu nan um ti kan thei ruangah kan hna ngam ih kan ral tha kan ralsiatnak ah tla kan ral tha the.

Tu ni ah nan fa le pawl in leh lo nei lo bangin hramlakah vawitampi ah in kan ngai tuk theu ih Christmas cante tal ah in ah kan tlung duh tiin in dil can te hman ah kan laimi pawl ih kan neih mi pathian ni christmas ni sunglawi ti vek zarhpini ti vek in hmuhsuam nak leh ral indonak ni a si theu tikah nikhatte hman khuan kan pek aw ngam lo ih, Christmas tla advance in kan rak hmang ih.

Christmas ni cu kan raldo ni a si ih hramlakah kan unau pawl kilhimnak neiin kan feh ni si, kan naupa pakhatte nih christmas zingah in lam ih sin a ken mi a nu leh a unau pawl ih an ken mi chusin (sweet) thuk 1 te pakhat ciar in zem ih merry christmas in ti ih in chibai in hramlak ih umtu pawl a thup ten kan kuat aw ih kan ti thei tawk ram leh miphun hrangah kan tuan ve a si.

asinan tu ni kan ram dothlengnakah nanmah nih in rak bawm vivoin kan nawn thei vivo ding ih kan ram hi ni nikhatah a zalen mi ram uknak a tha mi ram a si thei ding hi kan beisei a si. kan zaten kan unau tang tlang ding ih thazang in pek ring ring uh ti hi kan lo dil leh kan li ngen duh mi a si ti.

 

 

 

Author: admin

Leave a Reply

Your email address will not be published.