Chin National Defense Force-CNDF ih Chief of Staff, Salai Peter Thang in Mipi Hnenih Thucahnak

Hi tawk (Camp Rihli) ah kan ralkap pawl lawng silo in kiangkap khua ih mipi damlo pawl khal hinah an ra hmuh aw theu. Tu kan tuah rero mihi dothlennak asi. Dothlennak kan tuah tikah zo pawl in dothlennak an tuah ti sile cu meithal a kaitu pawl lawng kha asi lo. Dothlennak kan tuah timi hi (thil cangvaihnak) process pi pakhat asi.

Kan ral (ralhrang) ih an zohnak ah hin ziangmaw tlukha himi process ah poimawh asi tile cu hriam kaitu lawng kha si lo, thawhhlawm thlak an thei hmanah thawng an thlak cih. Cucu thawhhlawmte hman hi ziang maw tlukha dothlennak ih process a poimawh zia ticu kan ral pawl in an thei sawn.

Cuvekin himi dothlennak process pi ah hin kan zaten ralkap tuan thluh sehla kan do neh thei lo. Kan zaten ralkap tuan thluh sehla zonih tuahding thildang pawl tuanvo in laksak ding; zonih sumpai in pe nawn ding; zonih a lenglam ihsin rak bawmtu kha um nawn ding, tivek kha tampi a um.

Cu lawng hmankha silo in atu khalah kan mipi cozah ding theinak dingah ralkap pawl in ral an do ih, ahmai vakai ih ral rakdotu um; post rakkiltu an um; cule security rak latu um, inn lamah rakum ih rawl rak suangtu um; dunglam ih thiltulmi hriamhrei, ei-in phurin ထောက်ပို့ rak bawmtu an um; electric le pipe lam tuanvo latu an um; mine (bomb) rak tuahtu an um, tivek khan kha kan mah le kan hna cio khal ralkap sung hmanah khan an bang aw lo.

Kan mah kan ralkap sung lala tla hmai rori ih meithal hmaton ih kap lawngah dothlennak tuah le raldo ah khin kan ruat aw theu. Kan mah kan ralkap sung lala tla kan sim rero micu cumi kha a si lo ih, cuhman ih kan nih ralkap kha akha lawngah a tawk lo. Adung ih management (tawlrelnak) a tuahtu kan cozahpi ih a hnatuannak tla poimawh zet.

Asan cu cuih cozahpi hnatuanmi beisei ih kan nih ral kan domi asi. Kan ral pawl thi seh timen kha kan raldonak san a silo. Kan miphunpi cangkang seh, kan fimzirnak, harhdamnak le ziangkim ah mibang kan si theinak dingah timi kha si ih a cumi ih a dunglam ih ahnu rakthurh tu kan rinsan thei dingmi, kan nunnak kan thap ngamnak san cozahpi kha a hnget a tul, a cak a tul.

Cuvek thotho in cuih cozah cu mipi aiawhtu si ruangah cuih a mipi lala in “himi dothlennak ah kan tel asi; kan duh asi; himi dothlennak nan tuahmi hi nanmah te lawng tuahmi silo; kan aiawh nan tuah asi,”tin thazang peknak kha a tul tuk, a poimawh tuk. Cumi umlole cu kan bang.

Asan cu kan donak sanbik kha kan mipi hrangah asi. Kan mipi aiawhtu kha hinah ih cozahpi asi. Asan cu ralkap in sumhawlnak, fimzirnak, harhdamnak tuahsuaktum tivek; ralkap in thil dangdang ukawknak vun tuah tivek kha a ngahlo, a remtla rem lo, thilcang theimi tla a silo. Cumi planning umlo ih, cuih vision umlomi pi ih ralkap pawl kan nunnak alak ih thi dingmi cu a cangthei fawnlo.

Dunglam ih ummi kan mipi pawl khalin khakha kan cozah asi; kan ralkap asi timi kha thinlung lawngin silo in; kaa lawngin silo in, atak rori, kan mit rori kan hmuhthei ih a langthei kha a tul nasa.

 

Author: admin

Leave a Reply

Your email address will not be published.