Mipi hrang ih ral rin nak Tahan veng sungah military council ralkap leh police-pawl cu ralthuam thawn in tinah lut suakin in neitute cu electric bill pe teng teng dingin an sim.

Sagaing region, Kalaymyo-ah tualsung mipawl electric bill pe teng teng dingin  military council ralkap leh police-pawl cu in tinah lut suakin in neitute an sim ih, Hun tiam sungih an pek loh a si ah cun tihtawpsak an si ding thu simin an hro cih tiah theih a si.

Chin laimi umtamnak bik Kalaymyo tlang lam Tahan vengah ni 3 hrawng liam zo mi ih sin military council pawl cu RPG telin, ralthuam phun phun kengin veng sung mite inah lut suakin electric bill pe dingin  khawsung mi pawlin an sim.

 

Tahan veng sung mi pakhat cun, “Tahan vengih an ra nak hi tum thum hrawng a si zo ih, ralthuam phun phun an keng kim nasa ih, RPG ti pawl  an rawn pu ih, Meter box umnak inah an lut vivo ih, inneitute cu electric department office-ah bill pe dingin an sim a ti. In thenkhat cu bill an pe lo a si ah cun current tihtawpsak an si ding tiah an hro tiin a sim.

Military council pawlin cuvekih ralthuam ci kimg keng phahin civil mite umnak in ih lut suak cu  veng sung mipi pawl an thin a phang nasa a si.  Tahan tualsung mi nu pakhat cun, “Kan in ih an ra luh tum ah khan bill cahnah 6 in pe ih, hun tiam sung ih electric department office-ah bill na rawn pe lo a si ah cun kan lo tihtawpsak ding tiin in sim ih, ziangtin ti ding saw ti khal ka thei lo,  in tihtawpsak tak tak ding tih ka phang fawn si, ” tiin a sim.

Kalaymyo-ih electric (eng) regular takih a um lohnak chu a thla tel a si zo ih, tlai lam nazi 3 hrawngah current a um theu ih, zan lamah khal nazi 3 bak a um dah lo tiah a sim.

Kalaymyo-ah current um dan cu ni khatah nazi 24 aumih nazi 7 hrawng lawng a vang kan hmu thei thu Tahan veng sung miten an sim a si.

 

Author: admin

Leave a Reply

Your email address will not be published.