India Ram Assam State Tilian Ruang Ah Mipi A Thi Mi An Tam Cang

India ram Assam state cu monsoon(ṭhalruah) ruahsur nih ti a lianhter caah minung sing 6 hrawng nunphung a buai cang i( hartong), minung 9 nunnak tiang a liam cang, tiah India ram media hna nih an thanh. NDTV nih a phuan ning ah cun Assam state chung district(pengkulh) 27 ah cun tilian ruangah buainak/ harnak a tong lio. Minung 48,000 leng cu relief camp 248 ah ṭhial an si cang.

Hojai le Cachar district hna cu tilian a tuar faak khun mi an si i, minung singkhat leng nun phung a buai lio. Hojai district ah tilian nih a hreen mi thong leng cu Indian Army bawmhnak in an va thiarchuah hna. Dima Hasao district cu hmundang he pehtlaih khawh loin ni 5 chung a um cang. Ruahti tamtuk a tlak caah tlanglawng lam le motor lampi hna an cim, Assam ram pawngkam Tripura, Manipur le Mizoram pehtlaihnak hna cu an rawk, tiah theih a si.

A luancia nithum in khan Assam, Meghalaya le Arunachal hna ah cun faak ngai in ruah a sur i, Guwahati khuacaan thanhnak nih cun a ralai mi ni 4 chung tiang ruah a sur kho rih, tiah a thanh. India Union Home Minister nih Assam cu a si khawh chung in bawmh a timh, tiah Assam state chief minister Himanta Biswan Sharma nih a chim. Cupinah Assam cozah nih tilian ruangah nunnak a liam mi chungkhar hna sinah India sing 4(₹4,00,000) cio a pek lai, tiah a thanh.

 

 

Crd:TCP

Author: admin

Leave a Reply

Your email address will not be published. Required fields are marked *