Matupi Le Mindat Kar Kah Doh Nak A Linsa Chinchin Cang Ralhrang Thi Mi Zong An Tam Cang

2022 April 28 zing suimilam 7:30 ah Matupi in Kyaukthuh(ကျောက်ထု) lei rallam a sial mi SAC ralkap 300 hrawng le mawṭaw 70 cu Matupi-Mindat lam, Matupi in meng 16 a hlatnak hmun ah CDF-Matupi nih an kah hna. Cu kahdohnak ah SAC ralkap lei in 7 an thi i, hliamhma pumi an tampi, tiah CDF-Matupi nih cathanh an chuah.
CDF-Matupi hmunram ah SAC ralkap nih thazaang an chap tuk caah kahdohnak a zual kho. Cucaah fak piin thlacam kan bawm ko u, tiah an cathanh ah an langhter chih.

Salinkyi Palik Camp PDF Nih An Lak, Palik 8 An Thi!
Sagaing ramṭhen, Salinkyi(ဆားလင်းကြီး) peng Kyaṭat(ကျားတက်) palik camp cu April 28 chun 12:00 hrawng ah PDF nih an lak tiah theih asi. Kahdohnak hi Sml 4 chung hrawng a rau, a zammi zong an tam. Palik 8 tu cu a hmun ah an thi tiah Myaing(မြိုင်) PDF in Bo-Cross nih a chim.
“Nihin April 28 chun sml 12:00 ah kan kah hna i sml 4 chung hrawng kan i kap. An camp cu mei in kan khangh, an camp chung hriamthil le meithal kuan pawl cu mei nih a kangh hna i an puak. Palik 8 an thi, hliamhma he a zammi zong an um,” tiah Bo-Cross nih nih cun a chim. Kan i kah lioah Pale leiin a rak kaimi mawṭaw 4 cu Shweyamin(ရွှေယမင်း) khua kam ah bomb voi 4 kan puahhnawh hna caah mawṭaw 2 a rawk, tiah a chimchap. Cu kahdohnak ah cun Myaing-PDF, Yezakyu(ရေစကြို)PDF le Salinkyi-PDF hna an i bawm tiah theih a si.A luancia April 25 chun sml 12:00 ah Kaine(ကိုင်း) khua kam ah umhmun a khuarmi, SAC ralkap 100 leng cu PDF ṭangrual hna nih hriamngan, hriamhme he an kah hna caah SAC ralkap 7 an an rak thi, tiah Myaing PDF nih cathanh an chuah.

Kalay Ah Computer Dawr Ngeitu SAC Ralkap Nih An Tlaih!
Kalay lamzawhnak ah i putmi Viynal cung ca ṭialmi le catlap cung ṭialmi pawl man loin na chuah piak hna, tiah sual an puhmi San-hlah(စံလှ) computer dawr ngeitu Win Zaw cu SAC ralkap nih nihin April 28 ah an tlaih, tiah theih a si.San-hlah computer dawr nih hin, Kalay lamzawhnak ah hmanmi, Thazaang peknak ca, vampang benhmi ca, sticker le hmanthlak dang pawl man loin nan chuah piak hna, tiah SAC ralkap nih sual an puh hna i dawr ngeitu le dawr thilri vialte cu an chuh dih hna.April 26 zing ah Kalay lamzawhnak aa telmi Kyaw Soe Thwe(ကျော်စိုးထွေး) le a nupi cu SAC ralkap nih cuka computer dawr ah cun an rak tlaih hna, tiah theih a si.

 

 

Crd:TCP

 

Author: admin

Leave a Reply

Your email address will not be published.