Poland Le Bulgaria Nih Russia Cu Gas An Phih Piak Diam Hna

Poland le Bulgaria nih kanmah Russia phaisa in a man pek an kan duh lo caah an sinah Gas kan kua ti ve lai lo, tiah Russia energy company Gazprom nih a chim. Russia phaisa in an kan pek hlan chung paoh cu gas kuatnak rian kan tuan lai lo, tiin a chim.Russia remlo phunphai in a ummi ram pawl cu Russia gas man anmah Russia phaisa in pek dingin Putin nih nawl a chuah. Russia nih gas kuat an kan phih, tiin Poland nih a thanh. Asinain, Bulgaria belte nih zei a chim rih lo. “Russia gas lo in khua kan sa khotuk. Hi bantuk thil a tlun te sual ah, tiin a liamcia kum tampi chung timhlamhnak kan ngei cang. US le gulf ram he ti bantuk kan ramdanghawi le sinin gas laknak hmunhma a tampi ko,” tiah Poland deputy foreign minister Marcin Przdacz nih BBC ah a chim.

Tu kum i Poland gas company PGNiG nih Russia company Gazprom sinin an cawk manh mi hi 53% hrawng a si i, a tu belte cu Russia lei nih kuat an phih cang, ti a si.Gas an i cawk lio i hnatlaknak an ngeihmi Poland lei nih an buar, ti a si i, hmailei belte ah khat le khat i cawk, zuarnak kan ngei te kho ko lai, tiah Russia company lei nih an chim.“April thla chung ca tiang Bulgaria lei nih kan cawk cang hna caah, a tu bantuk i Russia lei nih gas kuat ti lo ding, an kan ti ah cun, phung an buar a si ve lai,” tiin Sofia in Bulgarian energy minister Alexander Nikolov nih a chim.“Chawlehnak kong i dun le dan vialte hi thatein zulh a si ko caah, tutan i Russia nih a gas zuarnak kongkau i karhlannak a tuahmi hi cu Ukraine ral he pehtlaiin a chawvalehnak hi hriamnaam pakhat bantuk in ai hman, ti a lang,” tiin Nikolov nih a chim.

A tutiang ko rih ah cun gas kan cawnnak hi phunghman a si ko rih. EU phung kan zulh bangin gas man cu euros phaisa in kan pek ko lai, tiin Bulgarian gas network Bulgartaransgaz i an director nih a chim.
Bulgaria nih hin Russia gas cu Turk Stream pipeline in a raminnpa Serbia, Hungary le Austria sinah a zuar chin. Nihin tiangah cun punghman a si ko rih, tiah Hungary le Austria nih an chim.Bulgaria le Poland sin i gas kuat ti lo dingin Gazprom nih biachahnak a tuahmi hi thildik a si. Cucaah, Russia remlo pungsan in a ummi ramdang zong anmah bantuk in tongh lawlaw an hau lai, tiin Russia top lawmaker nih Wednesday ah khan a chim.“An cung kan tuah bantuk tein a kan remlo mi ram pawl cung zongah tuah awk a si,” tiin Russia lower house of parliament biachimtu Vyacheslav Volodin nih a ti ve.Gas kuat ti lo dingin biachahnak an tuahmi nih hin Russia hi a chiatchuah ngaingai te lai. Hi bantuk cawlcanghnak a tuahmi ruangah Russia hi economic sal a tan phah te lai,” tiah UK Deputy Primister Dominic Raab nih Sky News ah a chim.

Cu ti i Russia nih thawngthanhnak a tuah le cangka, “Kan ram mei peknak hi punghman a si ko,” tiin Poland climate ministry nih a langhter colh ve.Kan kenret gas hman kan hau lo, gas cawtu hna zong kham an hau fawn lai lo, tiin Climate minister Anna Moskwa nih a chim.Russia nih gas a kan zorhmi hi ni khatkhat ah cun a tu bantukin a phunphun in a kan tuaitam te lai, ti kan theihcia caah a hlankan tein timhlamhnak kan ngei diam cang. Hihi cu thatein kan tawlrel khawh lai ti ka fiangtuk hringhran. Russia hi zeibantuk chawlehnak kongkau hmanh ah zumhraih awk a tlakmi a si bal hrimhrim lo. Cucaah, Germany hei ti bantuk European ram pawl nih Russia zinan le gas cawk hi an kham awk a si,” tiah Przydacz nih a chim lehlam awk.Poland hi cu tu kum dongh in cun Russia company Gazprom sinin gas cawk hi ngol an i tim hrimhrim cang. “Vawleitang kan i khonmi gas khur hi 80% hrawng a khat cang i, vaupi kan vun phak in cun tam chaphau kan si ti lo,” tiin Poland company PGNiG nih a chim.

Poland cu kadang in gas laknak hmun ai ngeih – Swinoujscie hmun in. May 1 cun Lithuania he gas pipeline thar bunh ding a si i, cu in cun Lithuania’s LNG terminal in gas a cawk khawh cang lai.October ah khin “Baltic Pipe” timi in Norway sinin gas pipeline thar bunh ding ai ngeih fawn rih. Kum khat chung i cawk dingin an i tinhmi gas a zat cu Russia nih a phihkanh len hna zongah an vun phihkhar khawh ding khi a fiang. Russia nih gas zorh a ngoltak hna ruangah Poland nih a ram chung i gas cawk a duhmi pawl a zorh kho ti hna lai lo, tinak a si hrimhrim lo.Kan hnung kum hrawnghrang tein khan Russia gas i bochantuk ti lo dingin Poland hi cawlcangh hram ai thok cang. A tu hi Qatar sinin LNG a cawk i, a pipelines pawl zong hi European market he a peh fawn hna. Cu lawng hlah, khuasik thla zong cu a liam cang caah heating zong a herhtuk ti fawn lo. Asinain, Gazprom sinin an cawkmi hi Poland nih ramdang sinin an cawkmi gas vialte i a hnarcheu bak a si ve. Phihkhar cu an hau ngaingai ko lai.

Russia zinaan le gas cawk ti lo dingin a titu EU ram lakah hin Poland lawng a si lo. Gas supply market ah Russia gas cawk lo dingin ai zuammi ram an tam ngaingai cang. Autumn a hung phak than tik i heating ca i gas a vun herh khun tik belte ah cun Poland hi thla tlawmpal chungcu ai cawl sek a hau te ve kho ti asi.
Cu tikah, heating ca i gas tamtuk a hmangmi sehzung nganpipi pawl cu gas hman a vun rengh deuh hna a hau te kho men. EU pumpi nih ramdang sin i natural gas an cawkmi vialte lakah Russia gas an cawkmi hi 40% hrawng a si. Asinain, Russia nih Ukraine a doh ruangah, a gas cawk ti lo dingin ram tampi nih biakamnak an tuah.US nih cun Russia zinan, gas le lungmeihol cawk ti lo dingin a kham dih cang. Tu kum dih in cun Russia zinan cawk lo dingin le a gas zong cawk ti lo dingin UK nih timhlamhnak a ngei. EU zong nih Russia gas hi cheuthum ah cheuhnih tluk a thumh ve cang.

Author: admin

Leave a Reply

Your email address will not be published.