US Nih Ukraine A Dir Pi Ning Cu Tang Lei Ban Tuk In Fiangten Langh Ter A Si Cang

Russia nih Ukraine a luhhanwhnak thla 2 a rauh hnu ah US official nih avoikhatnak a vung tlawng i, hriamnaam tha taktak telhin a dang hriamnaam bomh dingin le US i a cozah riantlai pawl Kyiv lei kir thannak lam ser dingin Washington’s top palai le defense secretary nih bia an kamh hna. Secretary of State Blinken le Secretary of Defense Austin nih Poland an tlawn pah i Ukraine President Zelensky le a dang top palai pawl cu Sunday i Kyiv ah an va ton cu Western ram pawl nih Ukraine an dirpinak langhter an duh caah a si, tiah theih a si.Russia sualnak ruang i ningti in a ummi Zelensky le a kingkap ram pawl cu $713 million man hriamnaam bomh dingin US secretary 2 nih bia an kamh hna. US palai le Ukraine hruaitu pawl cu nazi 2 chung bia an i ruah. An i suaisam ning nakin caan an lakdeuh, tiah US official nih an chim.

Putin nih a kalpimi tihnung ral lakah Othodox Easter hmanh hmang kho lo in an um ko nain, ralthatein a dirmi Ukraine chungum Orthodox Khrihfa pawl nih kan lung an kan ton hringhran,” tiah Blinken nih a chim.
Anti-missile system, anti-aircraft systems, hriam ai bunhmi mawtaw le tank pawl a ran khawh chungin US nih nan kan bomhnak lai, kan in nawl hna, tiah US secretaries 2 an vung tlawn hna hlan tein khan Ukraine nih nawlnak kan tuah cang, tiah Zelensky a bawmtu Igor Zhovkva nih NBC News ah a chim.Hriamnaam thadeuh mi le ngandeuh mi bomh dingin US le NATO pawl timhcia an sinak an langhter chinchin cang. Britain zong nih raltuknak mawtaw kuat dingin le, Ukraine caah Russia T-72s tanks pawl rak dohpiak dingin Poland kut zongah British tanks pawl kuat dingin khua a khan lio pi a si.

 

Western nih an bomhmi hriamnaam thatha hmangin Ukraine ralkap nih an khualipi Kyiv in Russia ralkap an thawl khawh hnanak kong tutan US palai an khualtlawnnak nih a langhter.
Feb. 24 i Ukraine a luhnawh hnu ah an khua ngan pakhat te hmanh a ningpi in a la kho rih lo. Kyiv a lak khawh ti lo in cun, chaklei le nichuahlei tu ah ai mer i, Donbas cu fak taktak in a vun kah.
Donbas hmanh ah hin a tetuai taktak vial lawng khi Russia nih a lak khawh, tiah nifatin update a tuah lio ah Britain defense ministry nih a chim.“Hmai ah sul a namngammi thitha ai ngeih hna lo caah Russia hi ai ruah ningin hlawhtlinnak phak ai duh ngai ko rih,” tiah British military intelligence nih a chim
“Hi khuamui caan hi kan ram nih a tei ko lai” tiah Kyiv ah a ummi kum 1,000 a hlun cangmi Saint Sophia Cathedral i Orthodox Easter a hman lio ah lungzur ngai in Zelensky nih a chim.

Punghmang tein hi khualipi i khua kan sak than te tikah khin cun, a rauhhlan ah ramdang nih an embassy zong an vun on than cio cang lai i, ram buai ruang i a zaammi khuami cheukhat hna zong a tu bantuk Easter caan sunglawi hmang dingin an hung kir te hna lai, tiin a chim.Washington nih Ukraine ah a um dingmi US ambassador thar rian a pek cang bangin, a ra lai mi zarh tlawmpal chungah US palai pawl Ukraine lei an kir than cang lai.Hmaitonh te i i ton lawlaw dah, ti lo cun lamdang a um ti lo. Ukraine lei kirthannak neh le nang a um cang,” tiin US State Department official nih Poland i thawnglatu sinah a chim. A min bel a langhter lo.


Kyiv in southeast lei meng 200 hlatnak ah a ummi Kremenchuk khua i zinaan le power plant sehzung hna cu Russia nih missile in a kah hna i minung 1 a thi, 7 hma an pu, tiah Poltava peng uk nih a chim.
“Ukraine mipi hi kan i hmaithlak hrimhrim hna lo. Cucaah mipi lainawngtu nan si, tiin Ukraine nih sual an kan phawtmi hi a hmanlo mi a si. Remdaihnak kong ceihhmai ti an duh lo caah Ukraine nih an tawn chommi lawngte a si,” tiin tutan raldohnak hi ‘special military operation’ tiin min a bunhtu Russia nih a chim.
EU zong nih Russia zinaan lak lo dingin phihkharnak tuah an i tim, tiah European Commission vice-president Valdis Dombrovskis nih Monday i a chimmi cu The Times nih a langhter.

Easter cu kahdaihnak um dingin Pope Francis nih a duhnak a langhter. “A tha a batuk cangmi mipi hna bawmhchanh awkah kahdohnak hi ngol cang u. Ngol u!” tiin Pope nih a chim.
Mariupol le kadang i tlungmi minunghawi an temtuarnak hi a zualhmatuk. Cucaah, minunghawi bawmhchanhnak lam hi serpiak hram ko hna u, tiin vawleicung i Eastern Orthodox Christian i thlarau lei an lubik Ecumenical Patriarch Bartholomew nih a chim.Central Europe ah a ummi biakinn vialte cu Ukraine ralzaam in an khat dih.Ukraine i a tlungmi Russia tuahsernakthalo mi hi a dihzau i kan inn cio kan kirthan cio khawh zau nak lai thla ka cam” tiin ram a chuahtakmi mipi million 5 lakah ai tel ve mi, kan hnung thla in Odesa in Prague ah a hung zammi Nataliya Krasnopolskaia nih a chim.Sunday ah khan Mariupol ah tartahak in a ummi Ukraine ralkap le mipi pawl chanhchuahnak kong he pehtlaiin Russia he biaruahtinak ngei kho dingin Ukraine lei nih an duhnak an langhter. Russia nih zapi theih in bia a let rih hna lo.

Russia he biaruahtinak nan ngeih khawhnak lai kan bomh ve lai, tiah Turkish President Tayyip Erdogan nih telephone in President Zelensky cu thazaang a pek.Mariupol i Ukraine pawl an ralhruang nganbik a si mi Azovstal steel sehzung cu Sunday in khan Russia nih kah an vun timh than cang. Cuka hmun ah cun a tlawmbik mipi 1,000 renglo an i dor, tiah Ukraine officials nih an chim.Cu sehzung pi cu vanlawng le miakpi in a vun kah cang. Miruak kan i khawmsua hna.. kan dirhmun a chia ngai ko…ai hliammi kan tam…a cheu cu an cat cuahmah ko hna..kan dirhmun khulrangtuk in chiat lei a panh manh ko cang..” tiah Ukraine 36th Marine brigade i a commander Serhiy Volyna nih a chim.Mariupol kan lak cang. Cucaah hi steel sehzung hi va lak len kan hau ti lo, tiah tuan ah khan Russia nih tlang a tlir bal cang.Mariupol an lak khawh ah cun, Russia a tanhtu Ukraine tapung pawl an ummnak Donetsk le Luhansk cu Crimea lei i Black Sea he an vun fonh khawh te lai.Mariupol lawngah a thimi kan mipi hi a thong a sang an phan cang. 100,000 renglo tartahak in a um, tiah Ukraine nih an chim. UN le Red Cross nih an chim ve ningah a thimi hi a tlawmbik a thong cu an si ko, ti a si.

 

Crd:Chelsea Bawi

Author: admin

Leave a Reply

Your email address will not be published.