AA Ralkap Nan Si Tiah Ruah Mi Minung Pahnih Cu SAC Ralhrang Nih An Tleih Hna Ning Cu A Poi Kho Taktak Si Ko

Rakhine ramkulh Muangtaw khuapi ah ‘Arakan Army ralkap he an i pehtlai’ tiah lunghrinh in tlaih a tong mi pahnih cu April 21 ah Muangtaw pengkomh SAC biaceihzung ah kum 10 thong thlak ding in nawl an chuah, tiah an chim.

Muangtaw khuapi ah Ko Ngi Ngi Niang le Muangtaw peng Ngwe Tuang khua mi U Aung Hla Ting hna cu phunrelnak 50 (အကြမ်းဖက်မှု တိုက်ဖျက်ရေးဥပဒေပုဒ်မ- 50) in dantatnak pek an si, tiah Ko Ngi Ngi Niang Sihni U Oo Khin Win nih a chim. Atu hi anmah pahnih cu Bo Thi Tuang thonginn ah an chiah hna tiah a chim chap. Ko Ngi Ngi Niang cu a luancia March 2020 chung ah Muangtaw – Bo Thi Tuang mawṭaw lampi ah bomb a hmanh, tiah lunghrinh in tlaih mi a si.A phone cu SAC ralkap nih an checkpiak i amah he hmunkhat ah U Aung Hla Ting zong, AA meithal tlaih mi hna he hman ai thlak mi an hmuh caah tazacuai ve a si. Ko Ngi Ngi Niang(ညီညီနိုင်) i a Upa  Ko Ko Niang (ကိုကိုနိုင်) nih cun ka naupa hi AA he pehtlaihnak a ngeih lo caah biaceihzung nih nawl an chuah mi cu ka cohlang kho lo, tiah a chim.

“Ka naupa cu sui sernak ah rian a ṭuan i a chungkhar a zohkhenh hna. AA ralkap chungtel zong a si lo.  Hmantlak an hmuh mi zong hi Photoshop in anmah tuah chom mi a si kho ko. Atu bantuk in nawl an chuah mi cu kan cohlang kho hrim lo, biaceihzung sang deuh ah( အယူခံ) court zong kan ong ti lai lo.  Zeihmanh zong a hlei ti lai lo,” tiah a chim.Rakhine ramkulh ah SAC ralkap le AA kahdohnak pehtlai in tlaih a tong mi minung 100 leng cu SAC ralkap nih uknak lak hnu in an thlah cang hna nain minung 20 hrawng cu atu tiang an thlah rih hna lo, tiah tualchung thawnglatu hna sin in theih a si.

 

 

Crd: The Chin Post

Author: admin

Leave a Reply

Your email address will not be published.