CDM Tuahtu Vialte Ralrinnak Ngei Cio Ding In U Phyu Wai Awng Nih A Chim

Fimcawnnak lei le ngandamnak lei riantuantu lak in CDM tuahtu hna an pumpak konglam cu ralhrang phu kuttang rianṭuan hna nih an khawmhsuat cuahmah caah CDM tuahtu vialte ralrinnak ngei cio ding in fimcawnnak lei department in cawlcanghnak tuahtu U Phyu Wai Awng nih a chim. A luancia ni tlawmpal ah khan ralhrang kuttang um fimcawnnak lei department le ngandamnak lei department hna in CDM tuah ruangah rian phuah a tong mi hna le CDM a tuahmi cozah rianṭuan hna i an pumpak konglam cu hmunkip i ramṭhen le ramkulh sin ah cazin an laak, tiah theih a si.

“Fimcawnnak lei rianṭuantu hna le ngandamnak lei rianṭuantu hna ca ah a hlei in theihternak le ralrin peek ka duh mi hna cu, atu nan umnak address he a hlatnak hmun pakhatkhat ah i dor cio uh, hmundang kal ding in harsatnak a um ahcun nan pawngkam felfai tein ngiathlai in ralrin a hau lai, thawngpang theih khawh i zuam peng uh,” tiah fimcawnnak lei in ralhrang uk duhlo cawlcanghnak ah thazaang a pe ngai mi U Phyu Wai Awng nih a chim. Ralhrang phu hna nih atu bantuk in ca an chuah mi kong ah thinphaang tuk in ruah lo ding in le thazaang zor in lungdonghnak ah hmang lo ding in thazaang peknak a chim chap. Ralhrang phu nih atu bantuk in an tuah mi thil kong ah mizapi lei nih teinak lam a nai cang, ti in ruah ding zong a chim chih.

U Phyu Wai Awng nih cun, “Ralhrang phu nih hramhram in nawlngeihnak an laak cu kumkhat deng a si cang caah CDM tuahtu hna cu thlahlawh an hmuhlonak caan a sau cang. Rian thar auhnak a um zong ah CDM tuahtu hna cu riantlai duh lo in a um mi zong an um. CDM tuahtu hna tam deuh cu an umnak khua in hmundang ah aa dor mi zong an tam. CDM cawlcanghnak a tuahtu hna hi a lamkip in kan sikhawhtawk bawmhkhawh i zuam cio ko hna usih,” tiah a chim.

Ralhrang phu nih nawlngeihnak an laak hnu, ralhrang kuttang rianṭuan duh lo ruangah ngandamnak lei le fimcawnnak department in cozah rianṭuantu hna tam deuh cu ralhrang uk duhlo langhter in CDM cawlcanghnak an tuah hna i cheukhat cu tlaihkhih zong an tong. Cun, zapi ngawt in rianphuah le an reng in thumh an tong fawn hna. Ralhrang tlaihkhih lai phaan ruangah a himnak hmun ah a zaam mi hna chung in nunnak a liam mi zong an um i, atu tiang ah umnak hmunhma thial khawh lo ruangah harnak a tong mi zong tampi an um, tiah DVB nih a tial.

 

Crd: The Chin Post

Author: admin

Leave a Reply

Your email address will not be published.