Sagaing Ramthen Ayadaw-Monywa Lam Cung Ah Le Ayawaddi Tiva Ah Ralhrawng Pawl Cu Bomb In An Rak Puah Hna Caah Ralhrang Lei Minung Tamtuk An Thi

Sagaing ramthen, Ayadaw(အရာတော်) peng, Ayadaw-Monywa lam cung ah January 7 zinglei suimilam 6:00 hrawng ah ralhrang hna cu bomb puah an tong i minung 12 an thi, tiah Ayadaw Falcon Force nih a thanh. Ralhrang phu cu January 6 zaan ah Kyun Phu Pin(ကျွန်းဖိုပင်) khua le War Tan (ဝါတန်)khua ah thil thuam sawhsawh in an lut i nizan zinglei suimilam 6: 30 hrawng ah, War Tan (ဝါတန်)khua nitlak ei ah bomb thianh (hrawh) ding in an kal lio ah mizapi vengtu ralkap phu hna nih, bomb 4 le Tomi meithal in voi 1 an kah hna, tiah an chim.

Cun, zing suimilam 9:00 ah Dingsii kung 3(မန်ကျည်းသုံးပင်) lei in a ra mi ralhrang phu cu bomb 3 in an doh hna caah ralhrang 12 an thi, 8 hliam an tuar, tiah a langhter. Ralhrang lei nih an kah ve hna nain mizapi vengtu ralkap lei in aa hliam mi um lo tein an kir kho. War Tan khua nitlak lei mongkalong dum ah rian a tuan mi 2 cu ralhrang nih an tlaih hna. Cu kahdohnak cu Ayadaw Falcon Force (AF2), TharPyiNgwe ralkap phu(သပြေညို ပြောက်ကျားတပ်ဖွဲ့), AyadawBone Naing( A.B.N.PDF, Knights Of The Red Land (KORL) le Patamyia Ngi Nuang ralkap phu(ပတ္တမြားညီနောင် ပြောက်ကျားတပ်ဖွဲ့) (aa fonh cia mi phu an si) hna nih hruai in, M.R.T.F ralkap phu, The Guys Of Burma Revolution Force(GBRF), Tamantaw ralkap phu( တမန်တော်ပြောက်ကျားတပ်ဖွဲ့)(APOSTLE) hna he i bawm in an tuah mi a si, tiah a DVB nih a tial.

Kachin Ram le Sagaing Ramri i a um mi Ayeyawaddi tiva ah ralhrang tilawng pakhat cu Myohla-PDF le KIA nih January 5 le 7 ah khan an bawh hna i an kah hna. Motor pakhat tiva ah a pil i ralkap 50 nak tlawmlo an thi, tiah Myohla-PDF sin in theih a si. Vanmaw(ဗန်းမော်) peng, Natkhoh(နတ်ခုတ်) khua pawng ah January 7 chun suimilam 12:30 le Butaung(ဘူးတောင်) khua pawng chunhnu suimilam 2:30 hrawng ah Myohla-PDF nih an bawh hna i an kah hna. Ralhrang lei hi tilawng pahnih in an si. Culak ah pakhat cu a rawk i Butaung khua ah an taang.

Tilawng a rawk mi chung i thilri pawl laak ah ralhrang 30 hrawng cu motor pathum in an rak ra. Cu liote ah cun Myohla- PDF nih an kah hna i an motor pakhat tiva chung ah a pil, ralkap 50 nak tlawm lo an thi, tiah theih a si. Cu bantuk in January 5 zinglei suimilam 9:30 hrawng ah Kathar(ကသာ) chak lei um mi Nalayinn(နလယ်အင်း) khua pawng ah ralhrang tilawng pawl cu KIA nih an bawh hna i an kah hna. Mah tilawng pawl cu zanlei suimilam 2:00 hrawng ah Minlay(မင်းလယ်) khua pawng an phaan. Cuka ah cun Myohla-PDF nih an kah chap hna i tilawng pahnih an rawk. Ralhrang nih hriamngan in ruahdamh in an kah ve hna i caw pali an thi, tiah Khit Thit Media nih a tial.

 

Crd: The Chin Pos

Author: admin

Leave a Reply

Your email address will not be published.