Mizo Ram Ah Hriam Nam An Thleih Mi Kong Ah CDF Mara Nih Fian Ter Nak An Tuah

India-Myanmar ramri hmunkhat ah puahkehnak a chuahter khotu hriamthil, India ralkap nih an tlaihnak hmunhma cu Mawhring (မော်ဟရိန်) khua a si lo, tiah Chin mizapi vengtu ralkap CDF-Mara nih nizan January 7 ah cathanh an chuah. Media cheukhat hna nih thawng a phawtzamh ning ah, India ralkap nih raldohnak hriam an tlaihnak hmun cu Mawhring (မော်ဟရိန်) khua ti in an rak langhter. Hi kongkau ah hin CDF-Mara nih cathanh an chuah i, “India ralkap nih hriamthil an tlaihnak hmunhma cu Mawhring (မော်ဟရိန်) khua he pehtlaihnak a ngei lo,” tiah an langhter.

“Hriamthil tlaihnak hnun le Mawhring khua cu pehtlaihnak an ngei lo, hi thawngpang dik lo kong ah khua chung mi hna cu thinphang in an um i, theihternak tuah ding in nawlnak a um caah cathanh kan chuah hi a si,” tiah CDF-Mara in chimphuannak nawlngeitu nih a chim. Cu hriamthil tlaih a sinak hmunhma cu India-Myanmar ramri tiva pakhat ah a si, tiah a chim chap. India ralkap nih puahkehnak a chuahter khotu thilri, 4.8 kuan cheukhat le chawnhbiaknak caah hmanmi thilri hna cu a luancia December 28 ah khan an rak tlaih.

India ralkap nih tlaihmi thilri kong he pehtlai in a ngeitu aho an si theih a si lo, hriamthil tlaih a sinak hmunhma dik lo in langhter a si caah cuka khua um mi hna le Myanmar ram in ralzaam dirhmun in aa dor mi hna caah thinphannak le hnahnawhnak a chuahter ngai, tiah a chim. CDF -Mara cu a luancia 2021, May 27 ah dirh a rak si cang, nain kan i humhimnak caah kan cawlcanghnak hna cu social media ah langhter a si lo tiah a chim chap. CDF -Mara cu CNA le Chin miphun hna umnak pengkulh hmunhma chung in mizapi vengtu ralkap phu hna he i fonh in raltuknak tha tein tuah khawh a si nakhnga phu 17 fonh in dirh mi a si. CDF-Mara cu Chinland Joint Defense Committee (CJDC) chungtel zong a si. Mizzima

Author: admin

Leave a Reply

Your email address will not be published.