Hruai Tu Tha Theih Khawh Nak Ding Ah A Hearh Mi Pawl Rel Ve Law Hlawk Nak Cu Na Hmuh Hrimhrim Lai

Biatlangvan: Kan i zuam ahcun ahopoah hi hruaitu kan si kho, hruaitu si hi cu thil harsa tuk a si lem lo. Asinain hruaitu ṭha si belte cu a har ngaimi a si. Hruaitu ṭha theihkhawhnak (Symbol of good leader) hi zeibantuk cauk hmanh ka zohchih lo, cherhchan ah ka hmang lo. Keimah nih hruaitu ṭha timi ka tahning, cuai ka thlaining le ka hmuhning te a si. Nangmah tahfung, cuaithlai ning le hmuhning aa pial-kaan deuh zong a si kho.

Pakhatnak: Zultu an ngei!

Hruaitu si ve i hruaimi (zultu) ngeih ṭung lo hi a poi mi a si. Zultu ka ti tikah Jesuh a zultu bantuk kha ka chim duhmi a si lo. Tahchunnak ah cozah zung pakhat i lutlai (hruaitu) cu a kuttangah rianṭuantu zeimawzat an um. Asinain ahohmanh nih an pu cu an upat lo, an ṭihzah lo. Cutin-khatin tuah uh, ti uh a ti caan zongah an ngai lem lo. Cucu hruaitu si ve i zultu / hruaimi ngeih lo cu a si ko.

Khrihfabu pakhat ah pastor na ṭuan, na member hna nih na cungah upatnak le ṭihzahnak an ngeih lo i thlanhri pawt in thawngṭha bia naa chimsek len zongah zei huaha ah an rel lo ahcun hruaimi a ngei lomi hruaitu na si tinak a si. Hruaimi hna nih an ṭihzah an upat ti lomi le an sunlawih ti lomi hruaitu nih zei pipa an tuah kho hrimhrim lo. Hruaimi nih an ṭihzah an upatmi le an dawt ngaimi hruaitu na hmuh ahcun amah cu hruaitu ṭha cu a si ko lai.

Asinain an Laiholh ah “Dawtu zahzat huatu zahzat” ti a si bangin dawtu lakah huatu zong an rak i cawh ve. Mah nih midang huat khi thilrit ngai pakhat a si bantukin midang nih huatmi si hi a nuam lo taktak mi a si. Minung hi zeitlukin kan ṭha kan fel kan ti ko hmanhah dawtu lawngte ngeih khawh a si lo, thilṭha kan tuah cuahmah ko bu zongin huatu le dotu an rak um tawn. A bik in hruaitu ṭha hna hi huatu le dotu an ngei khun. Bochok Aungsan kha hruatu ṭha tuk a si nain an thah ko. Mahatma Gandhi zong hruatu ṭha tuk a si nain an thah ko.

Hruaitu cheukhat cu hruaimi hna nih huat ding an ṭih / phang tawn. Cu nih cun thildik le thilṭha tampi tuah ngam loin an caan a liamter. Khua pakhat ah khuabawi thimnak an tuah i a ṭuan liomi pa nih, tutan cu ka thim ti hrimhrim hlah uh, khuabawi cu zungzal in ka ṭuan bal ṭung lai lo i ka ṭuan lo hnuah mi nih an ka huat lai, ti ka phang tiah a ti. Hruaitu si hnu-hnu ahcun mi nih huat le doh ding kha ṭih ding a si lo, hiti ka ti tikah zeiti poah in hruai ding ka ti duhnak a si lo. Mi nih huat le doh ding rumro na ṭih/phan ahcun zeitik hmanah dik le fel tein na hruai kho hna lai lo. Hruaitu ṭha cu huatu le dohtu ngeih phung a si ko, cu an huatu le dohtu hna kha na tlukrilhnak ah cang hlah seh, ding tein na kal khawh nakhnga cherhchan tu ah hman thiam i zuam.

Pahnihnak: Mi hman a thiam!

Minung hi san a tlai lomi ahohmanh kan um lo, kan santlaihnak tu hi a rak i dang cio. Hruaitu ṭha nih cun a hruaimi hna chungin anmah le santlaihnak le ti khawhmi cio kha a zoh i ṭuanvo a pek tawn hna. Phundang cun a hmanzia a thiam hna. Zeipoah ah a hmanzia thiam timi hi a rak biapi tuk cu mu!

A haarmi nam cu a hmanzia a thiammi caah cun thing ngan pipi haunak ah a ṭha tuk nain a hmanzia a thiam lomi caah cun ṭihnung a si. Pathian bia-Baibal hmanh hi a hmanzia kan thiam tawn lo caah kan tlau lengmang.

Minung hman thiam hi a hlei in a biapi tuk. Hruaitu sawhsawh/hruaitu ṭhalo nih cun thil hmete in thil nganpi tiang keimah nih ka tlaih/ṭuanvo ka lak lai timi lungput an ngei. Midang kha hman le ṭuanvo pek an duh lo. Hruaitu ṭha tu nih cun a hruaimi hna kha anmah le an santlaihnak zawn cio ah rian / ṭuanvo a pek hna. Cucu a hlawhtlinnak dingah bawmtu ṭha bik pakhat a si. An santlaihnak zawn cio i ṭuanvo pek thiam hi a herh taktak mi a si. Hlan deuh ralkap chan lioah khan an fimnak le santlaihnak he aa tlak lomi ah ṭuanvo pekmi an rak tam ngamsam, cu hna nih ram an hrawh.

China mirum Jack Ma nih “Na company/rianṭuannak ṭhangcho seh ti na duh ahcun nangmah nakin a thiam deuhmi hmang hna” tiah a chim. Hruaitu si hi zeipaoh theih dih le thiam dih a hau lem lo. A thiam, a theimi hna kha anmah le zawn cio ah human thiam tu a biapi.

Pathumnak:Kutneh an ngei!

Hruaitu hi a zungzal in ṭuan a si lo, ṭuan caan te a um. Cun ṭuannak hmun i ṭhial zong a um. Hruaitu ṭha nih cun hruaitu sinak in aa dinh tikah, asiloah atu a ṭuannak in hmundang i aa ṭhial tikah kutneh a ngei hrimhrim lai. Chim duhmi cu hruaimi caah chinchiah tlak thilṭha pakhat khat a tuahta lai. Hruaitu sawhsawh, asiloah hruaitu ṭhalo nih cun ka ṭuan chungah zeitindah hlawknak ka hmuh khawh lai, ti lawng an ruat. Ka hruaimi hna nih hin ka tuahpiak hna seh, ka pe hna seh ti lawng an an bawh.

Anmah nih hruaimi hna caah tuah le pek an i tim bal lo. Asinain hruaitu ṭha nih cun hruaitu a si chungah hruaimi hna caah hin zeibantuk thilṭha dah ka tuah khawh lai, ti an ruat. Cuticun hruaitu an si ti lo hnu zongah thilṭha an tuahta mi kutneh an ngei i mi nih an upat hna.

Khrihfabu pakhat ah kum nga chung Pastor (hruaitu) na ṭuan, na rianṭuannak in naa dinh, asiloah hmundang i naa ṭhial tikah kutneh pelpawi te tal na ngeih lo ahcun pastor ṭha na si lo. Cu bantuin zeibantuk poah ah siseh hruaitu a ṭuan chungah chinchiah awktlak kutneh a ngei lomi cu hruaitu ṭha a tling lo.

Palinak: Mi a sersiam!

Hihi a biapi taktakmi a si. Hruaitu sawhsawh / hruaitu ṭhalo nih cun amah a tlukmi, asiloah amah nakin a fimmi le thil a ti kho deuhmi an chuak sual lai, ti an phang i cu bantuk minung chuak kho lo dingin a phunphun in an i zuam. Hruaitu ṭha tu nih cun amah bantukin hruaitu ṭha dang, asiloah mah nakin a fimmi le thil a ti kho deuhmi hruaitu ṭha chuak hna seh, timi lungput he mi a sersiam lengmang hna.

Hruaitu nih mi sersiam a thiam ahcun amah bantuk hruaitu ṭha an chuak lengmang ko lai. Hruaitu ṭhalo nih zeiruangah dah mi sersiam an duh lo?

  • Nihin ca lawng an ruat, thaizing ca an ruat lo. Phundang cun caan tawite chung ca lawng ruat in rian an ṭuan, hmailei caansaupi ca tiangin ruat in rian an ṭuan lo.
  • Anmah zawn lawng an i ruat, anmah an i nuamh poah ahcun midang cu zeiti poah in an um zongah a poi ah an chia lem lo.
  • Nahchuahnak lungthin an ngei.
  • Hruaitu sinak ah a harnak leikap kha an hrial, a nuamhnak leikap lawngin an kal. Cu nih cun hruaitu sinak thlah siang ti lo dingin a ṭemṭawn hna.
  • Midang zong nih ttuan ve hna seh, timi lungput an ngei lo.

Kan theih cio bang  hlan deuh ralkap chan ah khan anmah a lonh, a tei kho tu ding poah cu an tlaih hna, thongah an thlak hna, an thah hna. Atu hi a si ko cu mu! Hmailei ah hruaitu ṭha a si dingmi mino tampi an nunnak a liam. Mi an sersiam lo caah rampi a rawk, zeicatiah hruaitu ṭha an tlawm tuk, an um lo ti khawh hmanh a si hnga! Minung sersiam hi ram le miphun sersiam taktak cu a si.

Jesuh hi hruaitu ṭha a sinak, asiloah uar a um tuknak cu mi sersiam a thiammi hi a si. Hihi a rat hnawhchan, asiloah aa tinhmi a hlawhtlinnak hrampi a si. Caan tawite (kum thum) chung minung tlawmte (zultu12) hna hruaitu a ṭuan. Jesuh nih ṭha tuk in a sersiam hna caah vawleipi an thlen. A ngaingai ti ahcun Jesuh nih zei huaha rian a ṭuan manh lo pi. Asinain amah a um lo hnuah a rianṭuanmi pehzulhtu ding minung a sersiam ta hna.

Hruaitu ṭha a simi nih cun amah bantuk hruaitu ṭha kha a hruaimi hna chungin a sersiam hrimhrim lai. Zeitluk mifim, mithiam le thiltikho ngai va si hmanh sehlaw mi a sersiam lo ahcun a fimnak, thiamnak le thilti khawhnak cu amah a ṭuan chung ca lawng a si. Amah a ṭuan ti lo tikah hruaimi hna an ṭumchuk ṭhan ko lai. Cucaah kanmah le hruaitu kan ṭuannak zawn cio ah midang sersiam le tunmer khawh i zuam cio usih. Hihi Khrihfa nun muru zong a si.

By. Salai CP Lian

Author: admin

Leave a Reply

Your email address will not be published.