Kayinni Ramkulh Loikaw Le Shadaw Kal Nak Lam Pi Cu Kaphnih Kah Doh Nak Ruang Ah Zarhkhat Chung KNDF Nih Phih Nak Ca Cu A Tang Lei Ban Tuk In An Thanh

Kayinni ramkulh, Loikaw in Shadaw lei kalnak motor lampi cu nihin January 7 in January 13 tiang umkalnak nawl kan phih, tiah KNDF battalion 14 nih tuzing ah cathanh an chuah. Khua chung mizapi vengtu phu hna le nawlngeihnak latu ralhrang phu kar kahdohnak ruangah atu bantuk in umkalnak nawl phih a si, tiah theih a si. Ralhrang phu hna cu 2021 December 28 thawk in Loikaw in Shadaw lei ah minung thazaang tampi he ral lam an sial, lamthluan kip ah hriamhme le hriamngan he an duhnak hmunkip an kah.

Palawng khua ah umhmun khuar in mipi umnak inn ah thilri an fir, cun, cheukhat inn cu an hrawh piak fawn hna. Ral lam an sialnak lamthluan ah Kayinni mizapi vengtu phufonh he kaphnihkar kahdohnak a chuak, tiah battalion 14 nih cathanh an chuah.

 

Nizan January 6, zinglei suimilam 8:00 in chunhnu suimilam 3:30 tiang ah Loikaw-Demawsu kar Dawpusi (ဒေါပိုးစီ) khua pawng ah ralhrang phu le Kayinni ralkap phufonh kar faak ngai in kahdohnak a chuak, cu kahdohnak ah cun ralhrang lei in minung 8 an thi i minung 5 nih hliamhma an tuar. A thi mi ralhrang phu hna ruak cu minung umnak inn chung ah an chiah i mei in an khangh chih hna, tiah KNDF nih nizan ah cathanh an chuah. #Khit Thit Media

Author: admin

Leave a Reply

Your email address will not be published.