Zalonnak Ni Ah A Zalon Rihlo I; Luatnak Ni Ah Aluat Ballomi Chin Miphun Le Chinram

January Ni (4) cu Kawlram Luatnak Ni / Zalonnak Ni asi. Kawl Miphun cu an luat i Uktu Miphun ah an i chuah. Kawlram Miphun (😎 chung ah, anmah Kawl Miphun lawng hi, Zalonnak le Luatnak a tep mi, Miphun ansi. Sal dirhmun in SPH dirhmun ah, Leidip lak in, cuaithlir mi miphun ansi. Kanram thawtnam nak vialte an eidin i, Kanram Ropuinak le Sunparnak vialte, anmah Kawl miphun lawng nih an tinco. January thla ni (4), Zalonnak Ni aa thawk ri in, Miphung dang (7) cu; Bawi derhmun in Sal derhmun lei ah, panh in (Canan ram panh loin), Sal si hram kan thawk ve. Zalonnak Ni cu, Kanram le Miphun kawl sal ah, kan tla ni asi. Krifabu le Khrih pennak zong kawl biaknak le Kawl pennak ah, kan tla pi chih.

 

Kum (74) tiang, Kawl Sal ah, kan tannak, Zalonnak Ni le Luatnak Ni asi. Khrih nih an kan luat ter cang tiah, Baibol ahcun a um nain, kan chan chung ah, voikhat hmanh, a zalon ballo i, aluat ballo mi, Chin Miphun kansi. Khrih i pek cia mi, Luatnak Tlamtling zong, kan thlau chih caah, Buda Biaknak cu, cungnung bikah, khua asa. Khrih Pennak le Krifabu zong a dolh chih mi, Kawl pennak le kawl biaknak asi. Kawl Politician si awk ah; အမျိုး ဘာသာ သာသနာ timi Kawl Miphun, Kawl Nunphung, Kawl Caholh, Kawl Biaknak a kilventu asi lai ti asi. Kawl Biaknak hi 75% in hram a thlak lai ti asi. Zalonnak Ni le Luatnak Ni a hlawhtlin tertu, Panglong a thih ri in, Burmanization timi in, Kawl Luban kip nih, ram an hruai. Oneness timi Theology he aa lawh ngai ngai. One Nation (Miphun pakhat – Kawl lawng lawng), One Language / One Literature (Caholh pakhat – Kawlca), One Social Culture (Nunphung pakhat), One Religion ( Biaknak pakhat), timi kawl miphun pakhat lawng siternak cu, Zalonnak Ni ah, hram a thlak ve. Phunghrampi le Upadi kip ah Kawl Phung, Kawl Dundan le Kawl Biaknak rim lawng a nam. Amah tein a Kokek Sining he a um komi Democracy zong Sithman daw Democracy tiah kawl rim an nam ter. Amay Suh le NLD nih Federal Democracy ti ko ding cu Democracy Federal tiah Kawl Oneness rim namh ter mi Policy an ngeih ve. Cucaah Rakhine nih Thakbere cu a hring ah siseh, asen ah siseh athak ning aa khat ko an ti. Amay Suh le NLD cohlanlo siloin, kawl luban kip i Oneness Political Ideology kha lam hmuhsak duhmi asi. ZRA le Mara Army hi Kawl Politic Ideology le Burmanization thazang (Energy), Lamsial tu le Hlawhtlin tertu ansi hna. Kawl caah Nawntha le vawlei tha an si te lai. Zeitintiah Kawl Ralhrang thlak awk ah mithnawm le hlingso an si caah. MAH le Ralhrang Rallokap doh lio can ah Miphun Ralkap thazang dertertu ansi caah.

74 kum chung a luat ballo i A Zalon ballomi Chin miphun le Chinram chanchuah awk ah thisen le nunnak pekin Dothlentu Ram dawtu le phuntungtu hna hi an va ropui i an va sunlawi hrinhran dah. An keneh ai va dawh dah. Zalonnak caah a dothlen mi, miphun ah a lungfak tak tak mi liamcia fanau le Kanpa le hna kha, hlamh than cang kan phan riang mang. Kannih Chin miphun cu a Zalon rih lomi kan sinak hi kan mit khua a deihnak kum (34) lawng asi rih. Kawl Miphun cu, anmit deihnak thla (11) lawng asi rih. Sau a nguh lai maw? Lung a hring pah ko dakaw. Kachin khua hmuhnak cu kum (60) tarpa asi ve cang. Karen cu (74) asi cang. Zalonnak a dikmi mi an rak hmuh chung nak kum (74) asi cang. Zalonnak Pupu an si cang. Cucu dakaw, Chin Ralkap nih Kawl pennak caah kan dawi pet hna cu aw. Karen nih Chin cung ah zeitluk in dah an lung fak ve hnga? An mawh hrim lo. Acaan a um ah cun Laiphung ning tein Karen hi nawl ding an siko.

Kawl Uktu le Pennak kip nih, Tlangcung mi cu, Sal bantuki, uk zungzal kha, an duh. NLD nih kan duh bik mi, Democracy dik asi kan timi, Rallokap 25% cu, hlutdaw in an tum zong ah, Kawlrim le Buda biaknak rim, a tlau baklo, tihi hngalh a herh. NLD le Amay Suh an si zong ah, Rallokap le USDP ansi zong ah, a bambok le mantak kha an siko. MAH le Ralhrang Rallokap hi, an zual deuh i, an hmual a fak deuh ve. MAH nih Federal a ti zong, zumh bak lo ding. PR ati zong ah, zumh bak lo ding. PEACE TALK le NCA a ti zong ah, zumh lo ding. MAH le Rallokap nakcun, Satan le Khuachia va zumh ah, a hlawk deuh kho men. Doimangpa min tawh, thu i ngen hi Topa pasian aw ti awk in, lohtlau asi lai.


Tutan hi kan tei hrim hrim a herh. Hnu kir / lam tantin ah ngawl / ti asi ahcun, nunchung kawl sal ah asiko lai. Kaninh Tlangcung mi le Chinmi cu; MAH nih uknak a laklo zong ah, an kan chutmi, Zalonnak caah, Raldoh ding mi kansi. British Queen le Kan Pupa hna senthuh ciami, UK ah cahren tehte a um rih ko mi, an kan chut cia mi, Zalonnak le Kan covo vialte caah Raldoh ding mi kan si thiam thiam ko, timi zong hngalh cang ah atha lai. Nunlung Catlap ah tial ding, tufa hna rovui ding tihi hngalh zungzal awk asi. Cucaah MAH le Ralhrang Rallokap a thluk cikcek khawh mi Chin mi kansi ve nak lai, a lamkip in thazang chuah cio ding ah kan sawm hna. Zalonnak Ni ah a luat ballo mi miphun, Jesuh Khrih le Krifabu hmanh sal zuat aduhmi MAH le Rallokap ansi ko tiah a hngalh mi vialte nih, Kan Miphun ralkap cu, alam kip in thawnter cang hna usih. An thlam kauter hna usih. Ti thuk nak lei ah an kal khawh nak hnga, riakcaw khim tein le tling tein rawnh cang hna sih tiah sawm buin ka sermon ka dihter. Kaa lawm.

 

Crd:Joseph R. Thang

Author: admin

Leave a Reply

Your email address will not be published. Required fields are marked *