Yangon Hlaing Taya Ah Mipi Ralkap Nih Ralhrang Pawl An Kah Hna I A Thi Mi An Um

Yangon, Hlaing Taya peng chung ah a um mi ralhrang cu nihin January 6, zingka hrawng ah kah an tong i minung pahnih an thi, tiah CGF-YGN nih thawng an thanh. Traffic cawngtu ralkap pawl cu Pyin-Hlua-Aung(ပျံလွှားအောင်) Operation i a tengnge a si mi, Spring Revolution Flames(SRF) nih an kah hna.

 

Ralkap 7 an kah hna i, ralkap lei nih hin an rak leh ve hna, nain khawndennak um lo tein a himnak hmun ah an kir khawh kong le ralkap lei in minung pahnih an thih kong CGF-YGN in chimphuannak nawlngeitu nih a chim. Atu kahdohnak hmun hi Hlaing Taya siizung hmai i a um mi cozah zung ah a si. Hi hmun ah hin ralhrang nih umhmun an khuarnak thla 6 leng a si cang, tiah Hlaing Taya a um mi pakhat nih a chim.

Kahdohnak a dih hnu in Hlaing Taya chung lam pawl cu ralhrang nih an cawngh dih colh i checkhlatnak zong an tuah, zanlei suimilam 1:00 tiang lam an phih rih. Kaphnih i kahnak ah ralhrang lei a thi mi le hliamhma a pu mi kong pehtlai in biahalnak ngei ding in Hlaing Taya palek sakhan ah Myanmar Now nih phone an chawnh hna, nain phone an tlai lo. Tuzing zinglei suimilam 4:00 hrawng zong ah Yangon Federal Army le CGF-YGN i bawmh in North-Ohkala peng, Shwepohgan khuathar ah a um mi sakhan pakhat cu M79 40mm kutchep bomb in an puah hnawh hna. ‘Pyin-Hlua-Aung’ Operation hi NUG Ministry of Defence kut tang ah a um mi a si, tiah theih a si.

Crd: The Chin Post

Author: admin

Leave a Reply

Your email address will not be published.