Uk nak Lak Hnu Mipi A Thi Mi Le Tleih Khih A Tong Mi Hna Cazin

Taningtari ramthen, pengkomh pathum chungah February thla thawk in, ralhrang nih nawlngeihnak an laak hnu ah ralhrang phu hna le ralhrang kuttang um phu hna thahnak ruangah, thla 11 chung ah sualnak ngeilo mi 65 nunnak a liam cang, tiah Bee Tenasserim phu nih checkhlatnak tuahmi cazin ning in theih a si. Ralhrang phu nih nawlngeihnak an laak kong ah ralhrang uk duhlo in, dai tein lamzawhnak tuahtu mipi hna le CDM tuahmi cozah riantuan hna cu ralhrang phu nih phungning lo in an tlaih hna leng ah an nunnak tiang an laak hna. Bee Tenasserim phu nih an khomhsuatmi cazin ning ah; Taningtari ramthen chung ah pa 57 le nu 8, an dihlak ah 65 cu ralhrang kut in thah an tong tiah an langhter.

Pengkomh ning cazin laak mi ah, Thawai (ထားဝယ်) pengkomh chungah 34, Myait (မြိတ်) pengkomh ah 19 le Kawhtawng pengkomh in 12 an dihlak ah 65 an si, tiah theih a si. Hi cazin hi 2021 December thla tiang laak mi a si i, Bee Tanasserim phu nih an khomhsuatmi cazin a si. Ralhrang phu nih rallam sialnak ah an hrem hna, meithal in an kah hnanak ruang le pyusawthi nih an thah hna ruangah a thimi an tam, tiah cu phu nih cun an chim rih.

F

AAPP nih January 5 tiang cathanh an chuah mi ah Myanmar ram chung ralhrang phu nih nawlngeihnak an laak ni 339 chungah sualnak ngeilo mipi 1437 tiang ralhrang kut in thah an tong tiah theih a si. Tlaihkhih a tong mi dihlak hi minung 11,341 tiang an phan cang. Tlaih ding ah nawlchuah a tongmi hi minung 1964 an si. Ralhrang phu kut in thah a tong mi hna hi Yangon khua chung tambik an si i Mon ramkulh chung ah ralhrang kut in nunnak liam mi 12 an um, tlaihkhih a tongmi hi 400 leng an si, a luancia ni tlawmpal ah khan minung 200 cu thlah than an si tiah Than Lwin Times nih a langhter.

Crd: The Chin Post

Author: admin

Leave a Reply

Your email address will not be published.