TNLA Le Mipi Kah Doh Nak Khua Chung Ah A Chuak I Mipi Upa He Hngak Chia He Hliam An Tuar

Nizan January ni 5, zanlei suimilam 1 in 4 tiang Shan ramkulh chaklei Namkhan khua ah TNLA le ralhrang kar kahdohnak a chuak tiah kan theih. Hi Kahdohnak ah ralhrang lei in minung 5-nak tlawm lo an thi kho. Ralhrang nih Drone in khuachung ah mi an kawl caah fiang tein kan thei kho rih lo tiah khua mi pakhat nih a chim.

Ralhrang lei in a thi mi ruak hna cu hmuh khawh a si. TNLA lei nih tlanglei ah hnu an tolh i, kaphnih kar kahdohnak cu a dai. Nizan zinglei ah TNLA khuachung ah an rak lut, cu an luh thawng an theih bak in ralhrang nih hriamngan in khua chung an kah len caah kaphnih kar kahdohnak a chuahnak hi a si, tiah theih a si. Ralhrang nih an camp in khua chung hriamngan in an kahnak ruangah khua mi ngakchia 3 le kum upa 3 hliam hmafak an tuar.

THAWNGPANG DANG: Magwe ramthen Tazat peng ralhrang kuttang penguk palek bawi cit mi motor cu Tazat PDF nih bomb puah in kan doh hna, tiah Tazat mizapi vengtu ralkap phu nih cathanh an chuah. Tazat penguk palek bawi cit mi motor cu tazat khua in Tanmah khua a kal lio ah bomb puah in doh a ton hi a si. Penguk palek bawi cit mi motor pakhat le ralhrang phu cit mi motor; an dihlak motor pathum hna cu bomb kan puah hnawh hna, a thi mi le a hliam mi kong cu thawngfiang kan thei kho rih lo, tiah Tazat PDF chimphuannak nawlngeitu nih a chim. Khuachung mizapi hna zong nih ralhrang he a hlat khawhnak um cio ding le ralhrang hman mi si lo ding in, i zuam cio ding in mizapi vengtu ralkap phu nih cathanh an chuah.

THAWNGPANG DANG: Combodia PM Hun Sen le Suu Kyi an i tong lai lo tiah Ralhrang nih an chim Kawlram ah rat aa tim mi ASEAN Chairman a tlai lio, Combodia Prime Minister cu Daw Aung San Suu Kyi he an i tong lai lo, tiah Ralhrang nih an chim. Combodia PM le Suu Kyi cu tonnak an ngei lai lo, Asian he aa pehtlai mi le ram hnih kar pehtlaihnak kong ceih ding in kawlram rat aa timhnak hi a si, Suu Kyi he an i tonnak ding a ruang hrim um lo, tiah ralhrang lei chimnak nawlngeitu Bochoh Zaw Min Thun nih a chim. Combodia PM Hun Sen cu a ralai mi Ninga ni silole niruk ni hi kawlram ra ding in timhtuahnak a ngei, sinain, ralhrang lei nih phungning tein thanhnak an ngei rih lo. Hi kawlram rat aa timhnak kong he pehtlai in kawlram phu tam pi nih duh lo nak cathanh an chuah cio.

 

Crd: The Chin Post

Author: admin

Leave a Reply

Your email address will not be published. Required fields are marked *