Min Aung Hlaing Cu ASEAN Lei In Tan Pi Tu A Rak Ngei Diam

ASEAN biachah mi 5 zulhnak/langhternak a um lo ahcun Min Aung Hlaing cu ASEAN meeting a kai kho ti lai lo, tiah Indonesia President Joko Widodo nih a chim. ASEAN Chairman a tuan lio mi Cambodia Prime Minister Hun Sen cu kawlram a tlawn hlan ah Indonesia President Joko Widodo nih phone a chawnh i, Myanmar nih Democracy a hmuh khawh than nakhnga ASEAN nih Myanmar ram zulh ding biachahnak panga a tuah mi cu langhter le zulh a herh, tiah Indonesia nih Myanmar ram buainak kongkau ah a ruahnak a chimh.

“ASEAN biachahnak 5 cu zulh ngaingai a um lo ahcun ASEAN meeting ah kawlram cu ramkhel he pehtlainak a ngei lo mi a si lai,” tiah Indonesia President Joko Widodo nih a chim.Cambodia Prime Minister Hun Sen cu January 7 ah, kawlram ah rak tlawng ding a si. Ramchung, ramleng dohthlennak tuahtu phu pawl nih Hun Sen a rak tlawng ding duhlonak an rak langhter cang, Prime Minister Hun Sen nih Min Aung Hlaing uknak cu thazaang a pek, tiah mizapi nih an doh.

“Hun Sen Kawlram a tlawn timh mi cu ASEAN nih lungtling tein biachahnak a tuah mi zulhphung panga he aa kalh lawng siloin ralhrang tuahsernak tha a pe tu le ralhrang an sualpalhnak thuhpiak in, ASEAN ah cohlan a si khawh nakhnga aa zuam bia a si,” tiah dohthlennak tuahtu phu pawl nih January 4 ah ca an rak chuah. Cu caah Hun Sen cu Kawlram vawlei lamhter lo ding in kan i zuam lai, tiah ramkip dohthlennak tuahtu phu 273 nih ca an chuah.

Crd: The Chin Post

Author: admin

Leave a Reply

Your email address will not be published. Required fields are marked *