Daw Aung Sansu Gyi Bodyguard Nu Cherry Thet Cu A Tang Lei Ban Tuk In Bia Ceih Nak An Tuah

Rampi ruahnak pe tu Daw Aung San Su Gyi bodyguard tuanmi duh-palik uktu Cherry Htet cu a luancia December thla dongh zarh ah khan ralhrang palik nih bia an rak ceih. Biaceih zung nih biakhiahnak an tuahning ah cun kum thum thong thlak ding in dantatnak an pek, tiah sih-ni hna sin in theih a si. Police Act riantuan tu hna nih zulhdingmi u-pa-di in biakhiahnak an tuah, zeiruang ah cu biakhiahnak an tuah cu fianghlang in theih a si rih lo, tiah an chim. Thong thlak ding in biakhiahnak a um cang caah Naypyidaw thonginn in, Yametin(ရမည်းသင်း) thong ah thial a si cang, tiah theih a si. Duh- palik uktu Cherry Htet cu phungrelnak caang poh-mah 505(a) in thong chung biaceihzung tazacuai a tong mi a si.

THAWNGPANG DANG: Matupi Kahdohnak Kong Thawngpang; Chin ramkulh Matupi peng chung ah Chin mizapi vengtu ralkap CDF-Matupi le ralhrang phu kar ah nizan January 3, ah khan kahdohnak a chuak. Nizan nikhat chung ah kahdohnak voi 2 a chuak i, cu kahdohnak ah cun ralhrang lei in minung 3 an thi minung 2 a nung in tlaih an si, tiah CDF-Matupi nih an chim. January 3, zinglei ah CDF-Matupi chungtel hna nih Matupi-Palatwah motor lampi cung ah ummi Thaeboi(ထယ်ဘွေး) khua ah umhmun khuarmi ralhrang phu hna cu luhhnawh in an kah hna. Hi kahdohnak ah hin ralhrang phu minung 5 an thi; minung 15 hrawng nih hliamhma an tuar, tiah an chim chap.

CDF- Matupi in chimphuannak nawlngei tu Ko Nway Oo Lyin nih cun, “Nizan ah an umnak sakhan ah kan kah hna, cuka hmun ah cun ralhrang minung thazaang 40 in 60 kar an um. Nizan tiang bia fehter mi ah ralhrang lei minung 5 an thi i minung 15-nak tlawm lo nih hliamhma an tuar tiin kan theih,” tiah a chim. Cun, Matupi-Hakha motor lam cung ah a um mi Phalai(ဖလိုင်) khua le Ngalai(ငလိုင်) khua kar ah nizan zanlei suimilam 5:00 hrawng ah, lam a hrawng mi ralhrang phu hna le CDF-Matupi kar kahdohnak a chuak than i ralhrang minung 2 cu an nun bu in tlaih an tong, tiah theih a si. Tlaih a tong mi ralhrang phu chungtel minung 2 cu hriamthil tello in tlaih an si i, atu ah tha tein zohkhenh an si ko tiah CDF lei nih an chim. Nizan ah a cangmi kahdohnak ah thilcang fianghlang in theih a si rih lo, CDF-Matupi lei chungtel pakhat cu bomb hliamhma a tuar, tiah CDF-Matupi sin in theih a si.

 

Crd: The Chin Post

Author: admin

Leave a Reply

Your email address will not be published. Required fields are marked *