NUG Nih Mipi Sin Ah Biakam Nak An Chuah Mi Thawng Thar

Ramchung PDF hna sinah tlukruang tein hriamnam pek khawh dingin kan i zuam cuahmah lio a si tiah NUG Runvennak vuanci U Yi Mon nih Social Media hmang in mipi sinah a thanh. Nai i KNU Brigade-6 hmunhma Laykaykaw kahdohnak a chuah hnuin mizapi le PDF hna nih NUG sinah a rannak in hriamnam tling tein pek dingin an halmi kong he pehtlai in NUG Runvennak vuanci U Yi Mon nih a cunglei bantukin a chimnak a si.Cu lawng si loin U Yi Mon nih cun mizapi sin in ruahnak cheuhmi le nawlnak hna cu kan ngaih lai i ralhrang uknak a dih zaunak dingah a tak in kan ṭuan lai tiah a chim fawn. U Yi Mon nih social media hmangin mizapi sinah a chim/thanhmi cu a tanglei bantukin a si.

“NUG/MOD (MOD-Ministry of Defense) nih mizapi hriamtlaih in dohnak kha tinhmi ngei tein kan kalpi ko ti hi theihter kan duh hna. A bik in hriamtlai dang kan hawile hna he ceihkhannak ngei in pakhat hnu pakhat tuahṭuan kan i zuam ko. Hi zawn ah Chain Of Command tungtlang ser hi a biapi taktak mi a si. Mizapi dohthlennak vialte i Chain Of Command cu NUG/MOD le hriamtlai dang hna he i bawm in tlangtlaknak hi a si. Atu lio i ramchung hmunkip ah a chuakmi kahdohnak hna hi Chain Of Command​ tangah a kalmi a si.Mizapi le tlangtlaknak kha NUG/MOD nih ṭuanvo kan lak i raldoh lei tlangtlaknak kha hriamtlai dang kan hawile nih ṭuanvo an lak ve. Hmunkip, kahdohnak kip le mizapi ralkap vialte hna sinah Chain Of Command​ a phak khawh nakhnga din lo tein kan i zuam peng. Kahdohnak ah kan ralkap hna hliam an tuar, an thi ti thawng nan theih paoh ah NUG cungah nan phunzainak zong kan theihthiam tuk ko. A bik in social media ah NUG hi zeidah an tuah tiin mawhchiatnak a ummi hna zong kan tuaktan peng ko”.

“Asinain raldoh ningcang le tinhmi hna cu biathup an si caah mizapi sinah chimphuan thlu awk a ṭha lomi an um, cucu nan kan theihthiam nak lai kan in nawl hna. Minung tlawm-tam, tangka thazaang le hriamnam kong hna cu biathup an si. NUG/MOD nih kan ngeihmi Resources vialte hi santlai bik le hmualngei bik in hman kan i zuam ko ti hi kan in theihter hn.Atu ah hin Regular PDF tampi cu Chain of Command tangah fekfuan tein dirh an si cang bantukin hriamnam kong zongah ramchung dihlak tlukruang tein pek khawh kan i zuam cuahmah ko. Khatlei ah kahdohnak dirhmun zoh in biapi deuh in pek hmasa mi hna zong an um ti hi thanh kan duh hna. Ral kan doh tikah hriamnam hi a biapi tukmi a si ko nain hriamnam a paoh ah raldoh khawh cu a si ve lo. Nawlpek tlangtlaknak (Chain Of Command) ṭha tein sernak, hriamtlai hawidang hna zumh ngamnak le i bawmhnak, phurhthiarnak le pehtlaihnak, ningcang tuahcia mi bantukin ṭha tein cawlcangh khawhnak hna hi an biapi tuk hringhran”.

“Atu ah hin PDF hna cu hriamtlai hawidang hna he i bawm in kahdohnak hmunhma ah ral an do cuahmah cang i raldoh dingin timhcia a simi PDF tampi an um fawn. Khatlei ah tuanbia ah kan ton bal lomi mizapi dirkamhnak le hriamtlai bu hna lungrualnak tangah hi dohthlennak hi kan hlawhtling hrimhrim lai tiah kan zumh. NUG zong nih a dikmi lungput he kan thazaang dihlak chuah in kan cawlcang peng ko ti zong theihter kan in duh hna. Ralhrang hna kut a tuartu mizapi le raldohnak hmun ah nunnak thap in ral a do mi kan ralkap hna caah thazaang peknak bia le dohthlennak caah a ṭhahnem dingmi bia hna kha tampi in chim cio dingah kan in nawl hna. NUG/PDF hna hi caan pakhat cu kan pe rih ko u. Nan ruahchanmi theiparṭha an chuahpi ko lai. Ralhrang uknak kan sauter hrimhrim lai lo tiah kan in kamh hna. Kan ramkap hna le mizapi thapeknak le ruahnak cheuhmi hna zong ṭuanchuah dingin timhcia kan si peng ko”. Lettu: Salai CP Lian (CEO of TCP)

Crd: The Chin Post

 

Author: admin

Leave a Reply

Your email address will not be published.