Thailand Nih Kawlram Ralzam Zoh Khen Ding In Bia Kam Nak A Tuah

Thailand le Myanmar ramri hrawngah mizapi kilvengtu ralkap le ralhrang kahdohnak a zual chin lengmang caah Thailand lei ah a zam mi ralzam an karh ngai cang. Thailand ah a lutmi ralzam hna hi Thailand cozah nih phung ning tein cohlan le zohkhenh a um rih lo.

Asinain Dec 24 ah khan Thailand Prime Minister (PM) Prayut Chan-o-cha nih kan ram chungah a rak lutmi Myanmar ralzam hna cu ṭha tein kan zohkhenh hna lai tiah bia a kamh i ralzam hna sinah sii-ai le ei-din pek dingin ṭuanvo ngeitu hna cu nawl a pek cang tiah Bangkok Post nih a ṭial.

Thailand ah a lutmi Myanmar ralzam hna hi 90,000 renglo an si cang. Thailand PM nih ralzam hna ṭha tein zohkhenh dingin bia a kamh ko nain boruak a ṭhat in Myanmar ah kuat ṭhan ding an si caah ralzam umnak hmunhma serchap ding cu PM Prayut nih a onh ti lo tiah theih a si. Cu pinah Myanmar in Thailand ah zeidang harnak le buainak a luh chih lonak dingah PM Prayut nih ralkap cu nawl a pek hna tiah theih a si fawn.

Myanmar ralzam hna ṭha tein zohkhenh ding hi vawleicung hmunkip in zatlangbu hna nih Thailand PM sinah an halmi a si. Cu lawng si loin rammi hna cungah sualnak le ṭhatlonak phunphun a tuahtu ralhrang bu dirkamh ti lo ding zongin an hal chih fawn. Ref: Bangkok Post

Crd: The Chin Post

Author: admin

Leave a Reply

Your email address will not be published.