Mindat Peng Kah Doh Nak Ah Ralhrang Lei A Thi Mi Le Ai Khawng Mi An Tam

Chin ramkulh Mindat Khuiring khua ah December 22 chunhnu suimilam 2:00 hrawngah ralhrang phu le Chin mizapi vengtu ralkap CDF kar kahdohnak a chuak.

Cu kahdohnak ah cun ralhrang lei in minung 3 an thi,minung 5 nih hliamhma an tuar tiah Mindat peng (ပ.အ.ဖ) phu sin in theih a si.

Kaphnihkar kahdohnak a chuah dih hnu ah Khuiring (ခွီးရိန်) khua um ralhrang phu hna rallam cu Thalawng(ထာလောင်း) khua lei in a rami ralhrang phu hna he i fon in, Myinchi(မြင်းချည်) tlangcung ah umhmun an khuar tiah theih a si. Khit Thit Media

Relchap:Mizoram ah a linsa ngai mi, phung ning lo in Myanmar lei in kuva thei an luhpi i, Champhai DC Pi Maria CT Zuali nih a tlaihpiak hna kongkau ah Party le zatlang bu tampi nih aw-aan an ngei. Nizan December 22 ah khan Mizoram media ngan pakhat zonet nih Pi Maria CT Zuali biahalnak an tuah. Pi Maria nih phungning lo in a lutmi kuva thei a tlaih kong ah FIR kalpi a si mi cu cunglei bawi he pehtlaihnak an ngeih a zumh kong a chim.

Champhai DC Pi Maria CT Zuali Nih cun, “Mizoram i District pakhat bawi bik ka si ve caah ka riantuan ning dohkalh in FIR an pek hi a lung a fak pah ko, khualrang ngaiin palik nih FIR an kalpi caah ka lungthli te cun kaa lawm lo, sinain ka tuanpi hawi hna nawlngaihnak pin lei a si caah tampi leh ka duh hna lo,” tiah a chim. “Myanmar lei in kuva thei a lut mi a tlai ruangah chawlet pawl hi ka hua hlei hna lo. District pakhat Magistrate ka si caah ka rian ka tuan a si ve ko, hi buainak kongkau ah hin Mizoram cozah MNF ministry zong ka doh hlei lo, ka rian he pehtlai in ka tuan mi a si,” tiah Pi Maria nih cun a chim chap.

Phung ning lo kuva thei a lut mi donghter ding Mizoram chief minister le India Prime Minister Narendra Modi sin i memorandum a rak tialtu Environment and Social activist Pi Vanramchuangi nih cun hi kuva thei kongkau ah hin cunglei bawi an i tel ve a zumh kong a chim. “India phung hrampi zoh ah kuva thei hi myanmar lei in a lut kho ding a si lo nain India le Myanmar pehtlainak lampi hrawng in motor tampi nih kuva theih an phurh khawh i, cozah in tuanvo a ngeitu palik duty nih an tlaih duh hna lo caah a thlithup in a tawlreltu cu an um tengteng ko,” tiah Pi Vanramchhuangi nih cun a chim.

Hi lio ah hin Mizoram district dangdang hna zong nih Pi Maria dirkamhnak ah Myanmar lei in an District chung ah kuva thei luhpi sianhlonak phungphai an ser ve. Khawzawl DC CC Lalchuagkima nih cun nizan December 22 ah khan Khawzawl District chung ah Kuva thei luhpi le phurh sianhlonak cathanh a chuah, an cathanh nih thlahnih chung a nguh lai. Hi hlan deuh zong ah Saitual DC zong nih kuva thei luhpi sianlonak cathanh a rak chuah cang.

Crd: The Chin Post

Author: admin

Leave a Reply

Your email address will not be published.