NHM Kuttang Cozah Rian Tuan Mi Duh Lo Nak A Lang Ter Tupawl Dantat Khawh An Si Nak A Ruang

National Health Mission(NHM) tang i mizoram chung riantuantu hna nih Mizoram cozah sin ah an duhmi halnak ah duhlonak langhter in zung an kai duh lo mi cu tuah ti lo ding in Health and Family Welfare Department nih ngawl cang ding in theihternak a chuah. NHM tang riantuan hna nih zung an kai lo ruangah Mizoram district kip ah harnak an tong i khuate lei deuh sii-inn hna cu khar an hau, mizaw hna zong hmunpi lei ah thial an hau fawn, tiah theih a si

Lawngtlai District ah cun NHM tang riantuantu zeimawzat zung an kai lo ca ah sii-inn riantuantu an i daih lo i nau ngei ding mi tampi nih harnak an ton leng ah mizaw umlio zeimawzat hmunpi lei ah thial an hau, tiah thieh a si. Mizoram nichuahlei um Champhai District zong ah NHM riantuan zung kai duh lo an tam caah sii-inn riantuantu Doctor le Nurse an i daih hna lo i, Operation zong tuah khawh a si lo, tiah theih a si.

Health and family welfare secretary nih cun nizan tihni ah khan duhlonak langhter khapnak hi a chuah. Tulio cu Covid-19 ruangah mikip nih harnak kan ton lio a si caah Ngandamnak lei tlaitu cozah nih tha faakpi in rian a tuan cuahmah lio a si caah duhlonak langhter i zung kai lo a rem rih lo, tiah a chim. National Health Mission tang i riantuantu hna cu Section 3 of the Mizoram Essential Maintainance Act, 1990 phung ning in duhlonak langhter tilo ding in theihter a si i, phunglam an zulh duh lo ahcun dantatnak pek khawh an si lai. Hi nawlpeknak nih hin December 19, 2021 in thla ruk chung a nguh lai, tiah Health and Family Welfare, Mizoram nawlngeitu nih an chim.

Crd: The Chin Post

 

Author: admin

Leave a Reply

Your email address will not be published.