A Poi Kho Tuk Kan Chin Ram Paletwa Hi Kan Chin Miphun Nih Kan Veng Kho Te Hnga Maw

SAC khanhmi Social Welfare, Relief and Resettlement vuanci Daw Thet Thet Khine, ramri vuanci changtu Lieutenant General Thun Thun Naung, International Cooperation vuanci U Ko Ko Hlaing le Rakhine ramkulh Chief Minister U Aung Kyaw Min telh in mining 22 hna cu Dec 18 ah Chin ramkulh Paletwa ah an phan i zanlei 2:00pm ah Helicopter in Rakhine ramkulh Sittwe ah an kir ṭhan.

SAC vuanci pawl an phak hlan in Paletwa khuami hna cu leng ah chuak lo ding, lam ah i chawk lo ding le inn chungah ṭha tein um dingin ralhrang nih nawl an pek hna tiah theih a si.

Khuami pakhat nih cun “A biapi bik cu internet a ngah lo tikah peng chung mi hna nih thawngpang kan theih khawh lomi kha caanṭha ah an lak, hmasa zongah sifak le harsa in kan um i ṭihnak le lungdernak kan ngeihmi hna kha caanṭha ah an lak i Chin ramkulh Paletwa a zalong tein an leng. Tuan deuh ah kahdohnak ruangah tlik le zam in caan kan hmang. Atu ramkomh vuanci tiangin an rat mi cu Paletwa khuami hna an kan zomtaih a si, khatlei ah ramkhel hlawknak ah an hman tiah ka ruah” tiah a chim.

Khuaruahhar ngai a simi cu Paletwa a ra mi hna lak ah Chin ramkulh cozah upa le vuanci pakhat hmanh an i tel lo. Hihi ramri kongah buainak a tong lengmang mi Paletwa peng caah ṭihphaihnak nganpi a si tiah khuami pakhat nih a chimchap. Ref: Mizzima

Biatenh: Paletwa cu AA nih Rakhine ramkulh a si tiah tuanpi khan an chim lengmang cang. An ralkap hmunhma khuarnak le cawlcanghnak zongah an hman lengmang cang. Phan ding a um ngaimi cu ralhrang bu nih AA lemsoinak caah Paletwa hi Rakhine ramkulh chungah a telh khawh men ti hi a si. Chin ramkulh peng pakhat chung tlawnnak ah Chin ramkulh cozah upa pakhat hmanh tel loin Rakhine CM lehlam aa telmi hi a sawhsawh a si lai lo. A thli in timhmi le saduhthah pakhat khat cu an ngei hrimhrim lai. Paletwa hi Chin mipi le Chin miphun ralkap hna nih kan kilveng kho te lai maw?

Crd: The Chin Post

Author: admin

Leave a Reply

Your email address will not be published.