Myanmar Ralzam Bawm Ding In India Cozah Nih A Cohlan Lo Nak A Ruang

India ram Manipur le Mizoram ramkulh ah a lut mi le a dor mi Myanmar ralzam hna nih rampi nih pek mi minung hawi zawnruah bawmhnak hna hi an tinco ve awk a si tiah India ram i National Humin Right Commission (NHRC) chungtel a si mi Justice Mahesh Mittal Kumar nih a chim.

Mittal Kumar cu ramkulh cozah upa hna he nihnih chung biaruah ceihkhannak an ngeih hnuah Dec 15, Shillong ah tuahmi Press Release ah Myanmar ralzam hna harnak kong he pehtlai in biahalmi a lehnak ah a cunglei bantuk khin a chim hi a si tiah Mizoram News nih a ṭial.

Thawnglatu pakhat nih Myanmar ralzam hna he kongah NHRC hmuhning a hal mi zong “Pohmah 21 hi rammi si hna seh, ramdang mi si hna seh, nuhrin covo buar le chuh piak a tongmi vialte hna chanchuahnak a si” tiah Mittal Kumar nih a leh.

Cu lawng si loin Mittal Kumar nih cun “Ralzam hna kongah India cozah dirhmun cu a fiang tuk ko. Asinain khatlei ah ramkip hnatlaknak a um. I dornak hal timi hi a ruang tampi a um ko lai nain minung hawi zawnruahnak caah NHRC nih lam kan hmuhsak hna lai. Aho paoh nih bawmh an kan hal ahcun cozah sinah kan chimrel piak hna lai” tiah a chim fawn.

Manipur le Mizoram chung i aa dormi Myanmar ralzam hna cu biaknak le zatlang bu nih an si khawh tawk an bawmh ko hna nain ei le din, hnipuan le ṭhutdirnak ah harnak tampi an ngeih rih nak kong cu Mittal Kumar nih a chimchih.

India Central cozah nih Myanmar ralzam hna bawmh ding kong cu a cohlang lo nain kan ram chungah a ummi ralzam hna cu a si khawh chungin kan bawmh, kan zohkhenh hna lai tiah kan hnulei i Chin ramkulh Chief Minister hlun Salai Lian Luai le hlutdaw palai hna he tonnak ah Mizoram ramkulh Chief Minister Pu Zoramthanga nih a chim.

Myanmar ah ralhrang bu nih nawlngeihnak an lak hnuin India ah a zam mi an karh chin lengmang i Chin ramkulh in a zam mi lawng hmanh sing khat renglo an si cang tiah UNOCHA nih cathanh an chuah. Ref: Mizoram News

Crd: The Chin Post

Author: admin

Leave a Reply

Your email address will not be published.