Civil Hleili Ankah Hna Ruang Ah Nagaland Pawl Nih Duh Lo Nak An Langh Ter

Nagaland ah India security forces hna nih civil mi 14 an kahthah hna kongkau ah mizapi nih duhlonak an langhter i, duhlonak a langhtertu an karh chin lengmang. Naga phun ah phun ngan bik Konyak tribe hna nih cun civil mi kapthattu ralkap hna hi dantat an si lo ahcun Konyak Union nih ralkap he pehtlaihnak an ngeihmi vialte an hlawt dih lai kong le Mon District ah ralkap chawhleh zong an sian ti lai lo kong an chim.

Hi hnu deuh ah hin Eastern Nagaland Peoples’ Organization (ENPO) zong nih non-cooperative movement an kalpi ve i, an area chung ah ralkap pehtlai in program a um mi pohpoh ah an kal ti lai lo kong an phuan ve. Hi lawng si lo in an area chung hrimhrim ah ralkap lut ding laak zong an kham rih. Eastern Area ah hin Mon District, Tuensang, Longleng, Kiphire hna an i tel.

ENP nih Nagaland Eastern area ah India ram ni sunglawi Indian Independence day le Republic day lawmnak puai zong tuah ti lo ding in hnatlaknak an ngei rih. ENPO nih hin December 4 i Nagaland civil mi 14 kapthattu ralkap cu taza an cuai hna i, biaceihzung nih phungning tein bia ceih seh, tiah an hal. Hi leng ah hin Union Home Minister nih Nagaland kongkau a chim mi bia cheukhat cu khirh than ding in an duhnak an langhter i, Nagaland chung ah ralkap nawlngeihnak sang an pek mi “Arm Forces Special Power Act” cu hlip dih ding in cozah an hal.

 

Crd : The Chin Post

Author: admin

Leave a Reply

Your email address will not be published.