Kut Dot Dir Hmun In Tuan Bia Dawh A Tial Mi Nu

Ranu Mondal hi a mintling cu Renu Ray ( Renu Mandal ti zongin an auh) a si, October 10, 1959 ah West Bengal i Ranaghat khua ah a chuak. Hlasak a huam tukmi a si. Kum 19 a si ah Mumbai ah a ummi Babul Mondal he an i um i fanu pakhat an ngei. Vanchiat ah a pasal nih a thihtak i West Bengal i an khua ah a kir ṭhan.

Mondal cu sifak ngai in a um. A fanu cawmnak le zohkhenhnak caah tangka zong fangkhat hmanh a ngei lo. Tlanglawng dinhnak (station) midang tangka le rawl hal pah in hla a sa tawn. Kum zeimawzat a hung liam i a fanu zong cu a nungak ve. Midang kutdawh hal pah in a nu hla a sak tawnmi cu a fanu nih a duh lo caah a kaltak. A fanu nih a kaltak in kum 10 nak ah minthang ah a cang. A nu minthannak a theih in a fanu cu a nu sinah a rak kir ṭhan.

Ranu Mondal hi kum 20 a si in Night Club ah tangka phalh in hla a sa tawn. Asinain a chungle nih Night Club ah tangka phalh in hlasak cu an duh lo caah a ngol ṭhan.

Kutdawh in a vakmi a si ko nain a ti khawhtawk tein midang a bawmh lengmang hna, Bawmh dingmi a hmuh hna ahcun bawmh loin a kaltak bal hna lo. Amah bantuk kutdawh in a vakmi ei ding a ngei lomi a hmuh hna ahcun a ngeih zat a pek chin tawn hna. Midang rawlhal in aa cawmmi a si ko nain a rawlṭammi a hmuh ahcun rawl a pek hna.

Lamkam ah hlanlio hla hlui pawl a sa tawn, mi tampi nih a hlasak cu an theih tawn ko nain a aw aa dawhzia le hlasak a thiamzia an theithiam lo i an lanhtak lengmang. Nikhat cu Pathian nih amah bawmtu le cawisangtu dingah mi pakhat a vun thlah. Software Engineer a simi Atindra Chakraborty cu Mondal hla a sak tawnnak tlanglawng dinhnak ah aa din. Mondal hlasak thawng cu a theih tikah hlasak a thiamzia le a aw aa dawhzia kha a tlaih khawh colh.

A pawngah a va naih i hla pakhat in sa rih law video kan thlah lai, tiah a ti. Pi Mondal nih cun lunglawm tein a cohlan i Lata Mangeshkar phuahmi hla pakhat, “Ekk Pyar Ka Nagma Hai” timi cu a sak piak. Atindra Chakraborty nih a hlasak lio cu video a thlah i Social media ah a thlah. A rauh hlanah mi tampi nih a hlasak thiamnak an theih i minthang ah a cang.

Cuticun Sony Entertainment TV Channel nih Superstar Singer, Reality Show ah hlasa dingin an sawm i thiam taktak in hla cu a sak. A rauh hlanah Indian Actor (minta) Himesh Reshammiya muicawl (film) aa thlak liomi caah hlasak a sawm ṭhan. Himesh Reshammiya le Pi Mandol ‘Teri Meri Kahani’ timi hla an i tun (record), mah hla cu “Happy Hardy and Heer” timi film ah aa tel.

Mondal cu a lar chin lengmang i Music Directors tampi nih concert tuah dingin hnatlaknak an tuahpi. Cuticun kutdawh in a vakmi Ranu Mondal cu a min a thang. Mi nih an theih i a min a than hi 2019 ah a si i amah Mondal cu kum 58 a si cang.

Zeidah a kan cawnpiak?

Pathian nih cun mi cawisan aa harh lo. Cawisan a duhmi hna cu chikhat teah a cawisan ko hna. Cu bantukin mi ṭhumh zong aa harh lo.
Asinain Pathian nih hin a mikip poah in a cawisang hna lo, lungput ruahnak ṭha a ngei i midang cungah zaangfahnak le dawtnak thinlung a ngeimi hna lawng a cawisan hna. Ranu Mondal hi kutdawh in a vakmi si ko hmanhsehlaw cu lungput cu a ngeimi a si.
Cun Pathian nih zeihmanh tuah loin a ṭhu sawhsawh mi khi a cawisang bal hna lo, mah ti khawtawk in aa zuam pengmi hna khi a cawisan tawn hna. Mondal hi a um sawhsawh bal lo, lamkam kipah hla a sap eng cu mu!
Zeibantukin a si a fakmi le fimcawnnak a ngei lomi zong khi nautatnak le nehsawhnak lungput ngei hlah. Pathian nih a cawisan nikhua a phak tikah an bawmtu a si kho.
A aw a ṭha i hlasak a thiam tukmi Mondal hi kum 58 hnu lawngah Pathian nih a cawisan. Pathian nih a cawisan hlanah kum tam tuk sifah le retheih a rak tuar. Asinain Mondal caah Pathian a tlai lo. Zeibantuk dirhmun ah dah na dir? Zeibantuk harnak le buainak dah na ton? Na lung dong hlah, na thachia hlah! Pathian i bochan law naa tinhmi kha fek tein i tlaih. Pathian nih “a za cang” a ti hlan tiang lungsau tein hngah i zuam.
By. Salai CP Lian (CEO of The Chin Post)

Author: admin

Leave a Reply

Your email address will not be published. Required fields are marked *