Atu ram buainak nih pei kan fim le fim lo le biaknak lei ah kan i biatak le tak lo a langhter dih cang

Laimi lakah vawlei lei in siseh, biaknak lei in siseh, khua a ruat kho ngaimi le a fim ngaimi le Khrihfa biaknak lei ah a biatak ngaimi um dawh kan si rua lo hi teh ka ti. Atu ram buainak nih pei kan fim le fim lo le biaknak lei ah kan i biatak le tak lo a langhter dih cang ko hi ka ti. Chin pa ralttha le raldohthiam zong kan tlau dih cang rua hi.


Kan biachimmi le kan thil tuahmi ah thluachuah a um kho ti lo, lam a tluang lo. Thil kan hei hmuh khawhmi le tuak khawhmi hi a rak bi ngai ko rua, a rak thuk rua lo. Keimah ka fimbik kan tinak si lo aw, ka chim duhmi cu nan i fiang ko lai. Chinmi lak ah pasalttha le mifim le khuaruat kho le biaknak lei ah a biatakmi bak kan herh. Chinram le miphun ca bak a ruatmi kan herh.

Thantlang khua thil tonmi kongah Nehemiah le Israel miphun nih Jerusalem khua an saktthan bang in saktthannak ding caah thlacam le Kawl ralkap tthalo pawl kut in luatnak ding caah thlacamnak kan tuah rualrual in kanmah lei kap ah teh kan sualnak i chir in thlacam i Pathian sinah ngaihthiam kan hal ve awk teh a si ve lo maw timi hi ka ruat ttheu tawn. Mah duhnak lei lawng hoih in thlacam ding a si lo. Nitin kan chimsualmi le kan tuah sualmi le kan ruah sualmi kan sualnak vialte zong camchih i ngaihthiam halchih zong a hau ve tiah ka ruah.

Credit:Van Tum

Author: admin

Leave a Reply

Your email address will not be published.