Tukum Christmas Nan Tuah Nak Caah Nan Hman Ding Le A Dih Hnga Ding Phaisa Vialte Ralzam Caah Bawmhnak Pe Uh

Tukum Christmas tuah nakding ah a dih hnga mi tangka zat cu Ralzaam hna sin ah bawmhnak pek ding International Myanmar Baptist Fellowship nih forhfialnak cathanh an chuah.Hmanthlak kan tenh mi Cathanh hi rak rel ve hmanh zeitindah na hmuh ve ning?

Tulio Delhi Chin Ralzam Dirhmun Relchap:Thil pahnih biapi deuh (Delhi-Myanmar Refugee kong ah) (1). Tulio Delhi um Myanmar Ralzam ramdang kalnak caah a poi ngai tiah kan ruah mi cu “Home Ministry, lei nih Burma ralzam ramthum nak kal ding mi exit permit pek lo ding in a timhtuah timi thawngpang a luancia zarh 2 ah khan kan rak theih.Cun Nupi pasal auhnak a tuah mi, US, Australia le Canada timi embassy nih Visa pek cang mi le visa aa tlaih cang mi zong FRRO office ah caan sau ngai Exit permit an hal nak a si cang nain an pe hna lo i chuak kho loin Delhi ahcun an um rih hna.Nai te ah khan Exit permit a hal mi pawl cu FRRO office nih email an kuat hna i cu ahcun Documents dang an hal chap hna. Cu an hal chap mi hna cu a tlang pi in;

(i) Myanmar Embassy-Delhi ah “No Objection Certificate (NOC)” nan va lak lai ti asi.(ii) India ram nan rak luhnak, zeitin dah nan rak luh (Vanlawng maw, motor maw, Tilawng maw, khuazei in tbk vialte) Affidavit nan submit lai ti a si.(iii) Cun affidavit ah ah “A luancia kum(5) chung India ram nan umnak, India ram nan luh hnu ah pawngkam ram ah nan tlawng maw timi vialte, nan cawlcanghnak vialte AFFIDAVITS nan langhter dih lai ti asi.Asullam cu “Nan kal nak ding ram, atu ramthumnak lei ah kal nan timh mi hi Myanmar Embassy nih kan sianh ko hna, kal ko hna seh timi lungtlinnak NOC nan va lak lai (Myanamar Embassy-Delhi) ti asi.Ralkap uknak duh lo ruang ah le doh ruang ah, rampi ramkhel ruang ah ka him lo tiah a zaam cang mi kha, Myanmar Embassy ah report va pek, NOC va hal timi kha a sullam a um lo ngai mi, a thar in SAC ralhrang sin ah kan sining vialte vai i report ta bantuk a si ve. Thil poipang um sual sehlaw a donghnak ahcun Kawlram ah a taang mi kan chungkhar le tiang in an umnak an theih dih hna lai i an him lo ti khawh asi. Mah hi a tulio ah a poi ngai mi cu asi.Hi kong ah UNHCR Delhi Senior officer he voi 2 tiang meeting kan ngei cang, caan saupi kan i ruah nain dothlat sawhsawh lawng an si ve rih, zeital an chim kho te hnga maw timi cu ruahchannak zeihmanh a lang rih lo.

(2). Hi ka zawn hi a biapi ngai rua tiah ka ruah caah ka rak tenh Lawlaw lai:Laitlang lei, Mizoram in minung tampi Ralzam sok ding in Delhi an rak phan cang hna. Cun cheu khat mi tampi nih an rak kan pehtlaih an kan hal bik mi cu “Delhi UNHCR nih refugee a cohlan ti kan theih i a dik maw, Refugee ngah ahcun ramthumnak lei kal (Chungkhar unau auhnak, nupi pasal auhnak in fawi tein kal colh) a si lai timi thawng pang kan theih i a dik maw, kan rak ra lai kan ti ve’ tiah an rak kan chonh pah lenTulio boruak ah theih a her mi cu;

(i) UNHCR nih Myanmar ralzam a rak phan mi cu register tha tein a tuah ko hna. A si nain nihin tiang ralzam sinak cohlannak a tuah rih hna lo. Myanmar ca lawng ah si loin all nationalities in a si. Covid boruak ruang ah UNHCR officer an khar nak kum(2) a si cang, a tu zong an khar rih i remote system (online) lawng in i tawlrel a si. Cu caah RSD (Refugee Status Determination) caah Interview a tuah kho lo i Ralzam sinak taktak a pek mi hna an um rih lo. Zeitik ahdah RSD interview hi a thok lai timi zong theih a si rih lo pin ah Ralzam sinak (Refugee Status) a pe te hna lai maw timi cu chim awk a tha lomi asi.


(ii) Chungkhar auhnak, ramthumnak lei lenh nak (resettlement to the third country through UNHCR process and under family sponsorship or family reunification process)’ timi hi India ram caah cun UNHCR Card ngeih hrimhrim a hau mi asi. A ruang cu Delhi ah cun UNHCR card a ngei mi, refugee ah pom taktak cang mi minung lawng kha FRRO office ah Stay visa, residential permit timi apply tuah khawh a si.Cu FRRO office nih a pek mi Stay Visa, residential permit cu ramthumnak kal tikah exit permit tuahnak a si fawn. Cu caah UNHCR card a ngei lomi cu US le Australia ti bantuk nih an pom hna zong ah India Cozah nih Exit permit an pek hna lo caah chuah khawh or kal khawh a si hlei lo.Hi vialte pin ah, US, Australia le Canada ti bantuk ramthumnak Embassy nih Visa an kan pek zong ah , atu lio Home nih exit permit pek lo ding, Myanmar embassy ah NOC lak ding timi order thar a tuah mi ruang ah mizei hmanh chuah khawh a si rih lai lo tinak a si.FRRO’ kan timi cu “Foreigners Regional Registration Office” tinak a si i India ram a lut chuak mi vialte tuanvo latu (Lah-Wah-Kah bantuk) an si tiah a fawinak in kan chim khawh.An mah hi HOME Ministry taang ah a um mi an si i ram leng chauhnak exit permit, Police Clearance Certificate (PCC) an kan chuah piak tu, Stay visa le Residential permit vialte a tawlrel tu an si.

Laknak:Salai Cung Dawt

Author: admin

Leave a Reply

Your email address will not be published. Required fields are marked *