Tu Nai Teah Ralhrang Nih Thlanrawn Khua Inn Pathum An Khangh Than

Thlanrawn Khua Inn 14 SAC Ralhrang nih an Khangh Than.Nihin chun ah SAC ralhrang pawl cu Falam peng Thlanrawn khua ah an phan tthan i inn 3 an khanghpiak chap hna, tiah thawng kan theih.Khuami pakhat nih, “Taal ah inn an khanghpiak hna timi kan theih i kan khua zong an khangh sual ah tiah vehvat ah kan vung kal cu inn 3 an rak kaang cuahmah. Inn khat hmanh kan khamh kho lo,” tiah a chim. SAC ralhrang pawl Falam in Hakha lei an rak kai lei October 14-15 ah Thlanrawn khua biakinn pakhat telh in inn 13 an rak khanghpiak cang hna.

SAC Ralhrang nih Taal Khua Inn 11 an Khangh Than, Thilri an i Kalpi Dih.Nihin (October 25) zinglei sml. 7:00 hrawng ah SAC ralhrang nih Taal khua ah inn 11 an khangh i inn 8 a ciam, tiah khuami hna nih The Chin Journal ah an chim.Hakha in a kir tthanmi SAC ralhrang motor 50 hrawng le ralhrang thazaang 200 hrawng cu nizaan zaanlei sml. 2:00 hrawng ah Taal khua ah an phan i, Biakinn ah zaan an riak.

Falam lei an kir lai nihin zinglei ah inn 11 an khangh ta i inn 3 cu mei kan phalh manh, tiah Taal khua pastor nih a chim.”Nihin zinglei sml. 7:00 hrawng khan inn 11 an khangh. Khua in an chuah hnu ah khuami pawl kan vung kal i inn 3 cu mei kan thah khawh. Asinain, inn 8 cu a ciam dih,” tiah a chim. “Inn an khangh lawng si loin biakinn chung i Sound Box zong an i kalpi. Cun, innchung thilri, cabuai, tthudan, umkheng le khachuan tiang in an lak i an kalpi dih,” tiah a chim chap.

Taal khua hi Falam he meng 14 a hlatnak ah a ummi a si. Aluancia October 16-19 karlak ah SAC ralhrang pawl Taal khua ah zaan 4 an rak riak i inn pathum ciam lak in an rak khangh pin ah Caw pali an rak thah. Taal khua ah hin inn 36 a um i SAC ralhrang nih atu ah cheuthum-cheukhat cu an khanghpiak dih hna.”Atu ning hin cu khua kan hlam kho rih lai lo. Khua hlam zong kan ngamh rih lo. August thla zong ah khan ralkap an rak phan i kan khua vok 7 hrawng an rak thah cang. Falam peng ah Taal khua hi a temtuar bik kan si ko. Kan innlo an khangh i thilri kan ngeihmi vialte an lak dih tik ah rak tlun i khuasaknak hramdomh tthan ding zong kan i harh ngai lai,” tiah khua mino upa pakhat nih a chim.

Credit: The Chin Journal

Author: admin

Leave a Reply

Your email address will not be published. Required fields are marked *