AMERICA HRANGIH THUTHLUKNAK FIM LEHDIK BIK A SI JOE BIDEN

US president Joe Biden cun Afghanistan ihsin US ralkap laksuah fel an si cu, America ram hrang ih thutluknak fim leh dik bik a si tih a sim. Kum 20 lai Afghanistan mission an fehpi hnuah, US cun remawknak an rak tuah zo vekin Thawhṭan zan zanlai hrawngah khan an ralkap pawl hi an lachhuak kim thei a si.

President Biden cun, “President hrilawknak neih zik ah khan, America mipi pawl hnenah hi doawknak hi titawp ka rak tiam zo a si,” tiin a rak tiam aw mi cu tihhlawhtlin a si ta tiin a sim, Afghanistan doawknak fehpi a si hnu leh thutluknak tuah thei tu President palinak a si tih simin, “Kum 20 sung doawknak kan fehpi hnuah, America fapa leh fanute cu tu hlan ih sin rak tawp ter zo  ding a si nan, doawknak hmasawn leh dingin ka fial sunzawm duh nawn lo a si, tiah a ti.

Afghanistan mission an fehpinakah USD trillion hnih lenglo an cem tih President Biden cun a sim cih Brown University-ih researcher-pawl cun kum 20 sung Afghanistan-ah hin ni khatah USD Tan 300 lenglo US cun seng a si tiin a hmu.

Biden cun US ralkap pawl suah hlanah hin Afghanistan-ih America mi 90% te cu hruai suah hman an si tih a sim, Hitih lai ah hin Afghanistan suahsan duh, America mi 100-200 hrawng an um ih, hi mi pawl hi hruai suah leh  an tum tih a sim ih, hruai  tlunnak dingin can bikhiah, deadline khal an tuah lo tih a sim cih.

US President cun an ram ralkap 13 an thihnak, Kabul airport-ih bomb tipuaktu, Islamic State-Khorasan province (IS-K) pawl vau nghalin, an duhtawk mai lo ding tiin a sim. “America beih leh tihnat tumtu pawl cu kan lo dawi vivo ding ih, an thiltih man khal nan pe zel ding,” a ti.

 

Author: admin

Leave a Reply

Your email address will not be published. Required fields are marked *