Rung Lian Ceu Le Biak Hmun Sang Hna Cherhchan In

π™πžπ’π­π’π§ πƒπšπ‘ π‹πšπ’ 𝐏𝐚𝐒𝐑 𝐇𝐒 𝐊𝐚𝐧 π“π‘πšπ§πœπ‘π¨π‘π­πžπ« π‹πšπ’?Tulio cu US kan Lai Pathawng pawl paih ka zoh hnu in, pathawng pawl bia le hla theih pah ding a um ca zongah a si men lai, ka ruahnak ah Lai Paih rumro a taang. USA lei i kan Lai Paih an kalpi ning phunglam khi fiang tuk in ka thei lo, nain kan hmuh chun tete hi a tha tuk ko, tiah ka hmuh rih. Sinain hmailei caan pi tiang kan i Paih ding le kan pathawng pawl nih tunakin hlawknak tam deuh an hmuh ve khawhnak ding khua ka ruah ah, tu kan kalpi ning hi a za deuh te men lai lo, tiah ka ruat(An laksawng a tlawm ka ti duhnak a si lo). Zeitin dah Lai Paih cu kan thanchohter lai, rak ruat cio ve hmanh uh.

Tutan Vaurawng Paih ah khan Pathawng Rung Lian Ceu nih a facebook page ah $5000 in challenge khawh a si kong a tar. Cuve bakin pathawng Biak Hmun Sang nih challenge a tuah colh ve. Hi hnu in zeitin a si, ti cu chim a hau ti lo. Ka chim duhmi cu kan pathawng pawl an i challenge ah khin mipi lung a su deuh, an i Paih lai zong kan i ngaih khunmi a lo. Media pawl nih bia an vun tuah pah hna hnu lebang cun boruak a saang chinchin i online zongin an Paih zoh lai lo kan phung cio. Hi tikah ka ruahnak ah a hung lutmi pakhat cu kan Lai Paih hi contract sport phunin tuah khawh a si lai, tiah ka ruah. Contract Sport cu zei dah a si?A fawinak in chim ko ning law, boxing le MMA an i thuat hlan i min an thut hmasa bantuk khin a si ko.

 

US lei ah Paih kan kalpimi phunglam pinah hin, Paih organised tu vialte hmunkhat ah bia i ruahti sisehlaw Lai Paih organisation thar tuah khawh a si. Hi organization tangah hin cun pathawng pawl cu Paih tawlreltu nih ranking in paihter, silole social media boruak an ngeihning zongin paihter khawh an si lai. Paih Bual dangdang a um ve caah Event hi vawi tamtuk tuah a rem theng lai lo, nain champions pawl nih kum khat ah vawi 2 hrawng an taisawm an veen(defend) a hau lai. Weight category zong tam deuh a hau lai i, pound for pound in an i paih ah zoh a nuam deuh lai. Aa pai dingmi Athletes pawl cu PPV le Tangka a lutmi in phaisa cuzat% na ngah lai, tiin min thutter, silole sungh ahcun cuzat tei ahcun cuzat ti zong in le adang zong a um kho lai. Paih kalpining kong ka chimning nak tha le felfai deuh zong tampi nan theih ko lai. Hi bantuk a si ahcun pathawng pawl zong nih a sawhsawh in an i pai ti lai lo.

 

Professional sports a si lai caah, Champion duhnak pinlei ah eikawlnak tiangin hman khawh a si cang lai.Phaisa tampi hmuhkhawhnak a si lai caah kan lai Paih bantuk in aa pai vemi Naga miphun zong nih Paih ve an duh te lai i, laimi nih tuahmi a si ruang ah lai pathawng pawl ca ah advantage nganpi a um lai. Cuti Naga miphun zong an i paih ve ahcun PPV in a cawmi, Chin miphun zat bak an hung karh ve lai i, Paih tawlreltu (organization) caah management tuah zong a fawi deuh fawn lai.Hi bantuk in kan tuahding ahcun Tangka tampi invest hmasa a hau ko lai nain, hlep(profit) tlawmpal tete a tuah te lai, ti cu a fiang. Tutan kan Paih ah khan Vanmi Production nih an langhter ning ahcun PPV in a cawmi 30k leng an si, an ti. Tahchunhtnak ah Naga miphun he 50k nih zoh hna usihlaw PPV man hi $30(a tlawm cem ah) lawng si hmanh sehlaw PPV lawngin $1.5 millions cu kan hmuh thiamthiam lai, tinak a si. A hmun zohman le sponsor he cun 2 million tiang a phan kho hnga! Paih tawlrelnak le athletes hlawh ah $1.5 million hmanh kal sehlaw profit cu a um thiamthiam ko lai.

Sinain, hi bantuk tiangtiang tuah kho ding cun kan Paih Bual standard khi kaiter deuh a hau ve lai. Paih zoh nuamhtertu ah commentators thiam, Paih a hngalmi, Athletes pawl profile fiang tein chim kho ding le Vawleicung hmai zongah zahpi um lo ring announcer zong kan herh lai. Cu pinah kan i paihnak hmunhma zong hinak video thlak nuam le miphun dang zoh duh ding in kan sersiam deuh a hau hnga(tahchunhnak ring chung ah paih). A herh hmasa bikmi cu tangka tampi investment tuah a si ko lai. Hi vialte hi ka ruahnak aa chawkvaimi he saduh ka thahnak men a si i, a tha cem ka timi zong a si lo. Kan Lai Paih hi thangcho chinchin sehlaw Paih thiam pawl nih hlawknak tam deuh hmu ve hna seh, ti duh ah ka ruahnak vakvai ka vun aupi ve sawh bia a si. πŸ™Respect to all the chin wrestlers and Paih organisers.(ka siaherh deuhmi paoh kan tag hna😁, hna hnok nan ti cun zaangfah tein rak remove ko uh).
Photo: Tial Cung Thang & Rung Lian Ceu (chin wrestling fb page)

Credit: Tluangaa Zathang

Author: admin

Leave a Reply

Your email address will not be published. Required fields are marked *