Democracy lamtluang zawhtute tana inhmang thin Myanmar Idol Tv. BENJAMIN SUM

Zofate zinga kan mithiam neih leh kan chhuan em em Pu Tluanga chhakchhuak in a Tv. Benjamin Sum chanchin chhiar nuam tak leh ril taka a ziah hi en liam mai chi ah ka ngai lova ka lo post chhawng a ni e, lo chhiar ve la a ropui zia i hmu ang.

Aizawl City (AMC) huam chhunga Sihphir khawdai, Neihbawih ramah hian Mizoram Tlawmngai pawl NGOs for Democratic Myanmar te enkawlna Myanmar CDM Relief camp a awm a, Myanmar ram atanga Military Sipai Council sorkar hnuaia thawh ai chuan Democracy lamtluang zawhin engkim chan kan huam zawk a ni tiin CDM an zawm avanga an eizawnna chan phah ta, mi enge maw zat an awm khawm a ni.khawtlang leh kohhran-te zarah chhuanchham lovin an la awm a, tualchhung kohhran hrang hrang ten a remchan ang angin tanpuina thilpek te hlan a ni thin a, Pathian biak hona pawh an mahni pualin Covid SOP te zawm chungin an neih pui thin a ni.

Zirtawp ni 20.8.2021 khan kan unaute awmna CDM camp -ah hian NGO hruaitute zinga Pu Liantea chhungin an fapa piancham pualin lawmthu sawina inkhawm chu vawk talh meuhin ruai nen an lawm a,Pathian chawimawi a fakna hla sa turin kan tlar hma chiaha thu tlangval a rawn ding chhuak a, kan en chian chuan Myanmar rama Zohnathlak zaithiam Myanmar Idol Season 4 (2019) runner up Tv.Benjamin Sum a lo ni reng mai.

Tv.Benjamina hi Myanmar Idol thlanna dt.28th December 2019 khan Laimi Nl.Dawt Chin Sungi leh Nl. Aye Aye Phu-i te nen finalist an ni a ,TV ah pawh “Live” an tih chhuah laiin ka lo en ve fo thin a ni.Khami zan khan Esteri kha a khum tawh tiin ka hria a,mahse mipui SMS vote 50 % chuang hmui in Nl.Esteri khan Idol nihna a chang ta zawk a nih kha.Mizorama Ben Bena fan te chuan an star in Idol nihna hawn lo mahse Zohnahthlak tho hian Winner a nih avangin kan thinlai a dam tho mai. Tichuan Myanmar ram chhung mai bakah Zorimawi khawvelah a lar chak ta hle a,2020 May ni 18 khan MV Fb ah 24 hrs chhungin like 2,000,000 a nei hman a.Benjamin Sum hian YouTube-ah Subscriber 100,000 a nei tling tawh a, lawmman atan YouTube Silver Button pawh a lo dawng tawh bawk.

Myanmar Idol Runner up lo ni ta Ben Bena hi Myanmar ram democracy hmu let leh tura Mizorama hma latute an chetchhuah rual a piangin , ka hmu ve fo thin a ni.An zingah a tel ve satliah mai a ni lova, a kul a tai-ah a tang thin a, Vanapa Hall kawt ah hian mipuiin ,Military council sipai te thuneihna an lak vanga lungawi lohna lantirna demostration an neihna-ah te,Spring Revolution an neih tirh a nunna chan ta Martar-te sunna inkhawm an hman tum pawh khan zaithiam dangte nen ka hmu a ni. Chu mai a la ni lo, NGOs, MZP leh Mizo zaithiam te huaihawta kan unau Myanmar Zohnahthlak ral tlante tan vehbur khawna Aizawl khawpui an fankual tum pawh khan nilengin hah pawh sawi thei lo in zai rimawi vawrin a hun leh tha a lo seng tawh a ni.

Benjamina hi kan fapa naupang ber rual lek a ni a,27th November 2000 kumah khawvel eng a ran hmu tan a, Myanmar zofate khawpui Tahan, Hmunlai venga piang leh seilian a ni.A pa missionry hian a naupang tet lai kum 4 mi vel a nih in 2004 kum khan a boral san a,a farnu neihchhun hian kum 4 mi vel tho a nih in 2007 kum khan a lo boral san leh a, a nu Laldinpari (Numami) hian a fapa mal chu a tul pui ta a ni.Vanduai thlak takin a nu hian Benjamina middle school a zirlaiin natna tihbaiawm tak Cancer natna in a tlak buak a, doctor ten ngun takin an endik hnuah Cancer Stage III tih hmuh chhuah a ni a, Naupang Ben Bena tan chuan a nuin hetianga vanduaina a tawk hi a lainat awm hle mai.

Thing delh lo lung delh lo na na na chu Pathian malsawmna zarah a nu hriselna pawh a tha chho zel a, Kalay Computer University ah B.Sc. (Computer Science) 2nd year a zir laiin Myanmar Idol a contest ta a, tuna a dinhmun hi a thleng ta a, a nu leh pa te hi zai rimawi ngaina tak hlaphuah thiam leh zaithiam an ni a ,a nu zirtirna dawngin naupangte a nih lai atangin mipui hmaah a lo zai ar ar tawh thin.Zai lama tui mi tak a nih avangin a zirlai final exam pawh chhang zo ta lo chuan Myanmar Idol Season 4 (2019) competition neihna Yangon khawpuiah a kal ta a ni.

Tv. Benjamin Sum hi Myanmar CDM camp chhunga awm te chu a tul hun apiangah amah ngei in a tanpui theih nan camp-ah riah chilh meuhin a hun a lo hmang tawh thin a,camper te ei leh in tur motora an rawn phur thlen chang in a lo hlanthlak pui ve ziah tawh thin a ni.

Hrileng karah tlawmngaih chhuahin ke a pen chhuak fo thin vangin thawk khat lai khan Covid-19 a lo positive ve zuai tawh a. Myanmar sipai firfiakte vanga raltlante tanpuina kawngah a thawh hlawk hle a, Mizoram Tuipuiral tlangdung khaw hrang hrangah kalin Myanmar raltlan-te tanpuina a lo pe nual tawh bawk.Chu bakah youtube a a hla upload atanga a sum hmuh atangin Myanmar rambuai tanpui ngaite atan Cheng tam tak a mimal sum a tangin a lo sem chhuak nual tawh bawk.

Benjamin-a anga naupangte ni si,politician pawh ni hlei lo,a nu dam loh vanga a pi leh pute awmna Aizawlah doctor hnena in checkup tura lo kal ve mai a ni a,an mahni pawh harsatna tam tak an hmabak a nih mek laia mi harsa te tan a hun tam zawk pein mi tan a luang chhuak thei hi a fak awm hle mai a ni.Hringnun zinkawng tih lehkhabu ziaktu Sir Thangmawia chuan Benjamin Suma hringnun zinkawng hi a kawlawm hmanthiam hmangin ziak ta sela Ben Bena te nufa hring nun hi nitin hian chona thar zela an hmachhawn thiam dan te,Pathian rinchhana Beiseina nena zinkawng an zawh thin thu te,an nufa inhmangaih tak ten hringnun zinkawng thawnthu ngaihnawm tak an la neih dan turte hi a suangtuah thiam in a ziak thiam ngei ang.

Hringnun zinkawng kawi khatah hian chu zinkawng zawh ve mek midangte nen, kan in tawng thin a, then khat chu kan dam chhunga kan theihngilh tawh loh tur mi pamham, mi chimlim ,mi duham ,mi kawhmawhbawl ching leh midangte tai rana khawsak ching an ni a, ram leh hnam tan emaw khawtlang leh kohhran tan pawh a tangkaina sawitur nei reng reng lo turte an ni a, nu leh pate ngaihsak lova, mahni pian leh murna leh seilenna hmusit ching phei chu a taka inkawm in hmaichhanah in tawng lo mah ila “fb” khawvela hunawl hnawhkhah nana kan hman thin thian a tan pawh ka duhloh te an ni.

Chutih rual rualin hringnun zin kawng thuampuia kan vawikhat tawn atanga kan ngainat em em,an thil tih leh an thu leh hla hmanga hriat reng tlak thian tha kan tawng fo thin.Chutiang mite nen kan in tawn erawh chuan an tumruhna leh hmathlir avangin huaisenna min pe a, kan tum ram dik tak kan hmathlir chu paltlang thei turin kan harsatna te chu taimakna,chhelna leh beiseina te nen hmachhawn a,ngaihhlut tur dik tak kan hriat theih phah thin.

Rimawi hmanga mite tanpui a,min ti hlim thei,min chawk phur theitu Ben Bena zathiam kan nei hi keini Spring Revolutionist-te tan kan vannei hle mai.

 

Author: admin

Leave a Reply

Your email address will not be published. Required fields are marked *