AIZAWL-AH MYANMAR RALTLAN PAWL COVID VACCINE DAWTSAK

India ram, Mizoram state sungih Myanmar raltlan pawl cu Mizoram cozah leh NGO pawl tawrelnakin tusun August ni 19 ah hin Aizawl Covid vaccine a lakin an dawhsak tiah theih a si.

Covid vaccine a lakin injection-nak neih cu Aizawl Mualpui veng, R. Dengthuama hall-ih um Myanmar lam MP te leh Sihphir khuaih Synod Revival Camping Centre-ih um CDM raltlan (refugee)-pawl hrang bul tan a si thu NGO United for Democratic Myanmar pawlkawm Chairman, Pu Lawman heti hin a sim.

Covid vaccine dawng thei dingin kan nih pawl hin March thla laihawl hrawng ih sin khan Mizoram scozah hnenah kan rak dil zo ih, Cu kan dilnak cu in ngaih pawimawhsakin Mizoram cozah cun hiti hin Covid vaccine a lakin dawt theinak cu in tawrel sak thei ih, kan lungawi nasa a ti.

Pu Lawma cun, Tusun ah hin hmun hnihah injection nak neih a si ih, Mualpui veng R. Dengthuama hall-ih um Myanmar lamih Member of Parliament-te leh an sungte hrang, Sihphir khua Synod Revival Camping Centre-ih um, raltlan pawl hrang tiin hmun hnihah ruahmannak tuah a si, tiin a sim bet cih.

Cu bakah Mizoram sungih National ID leh Aadhaar card nei lo, Myanmar mipawl leh hnam dang pawl hrang khalah Mizoram cozah tawrelnakin veng dang dangah covid vaccine hi pek a si ding thu theih a si, hivek tho thoin, Mizoram cozah cun mini August ni 18 ah khan Indo-Myanmar border kiang, Champhai district-ih Myanmar raltlan pawl cu covid vaccine a rak dawtsak zo a si.

NGO United for Democratic Myanmar pawl cun Mizoram hmun dang dangah Myanmar raltlan pawl tanpinak fun raising lam hawlnak an rak tawrel bakah  tun tiangin Myanmar raltlan pawl um chilhin a buaipi ring ring a si.

 

Author: admin

Leave a Reply

Your email address will not be published. Required fields are marked *