MYANMAR PAWISA (KYAT) TUAH BET RUANGIH  THIL MAN SANG KHUNG DING HI.

Myanmar central bank cun Burma paisa (Kyat) hlutnak a tlak hniam lai takin ,an hmanlai paisa note pangngai cu an tuah bet ciam co ih, Thenkhat in Kyat Thawngnga(5000) leh Kyat Thawnghra (10000) tih thi ih, paisa note thar tuah tum vekih thuthang an theih hi a dik lo ih, an paisa hmanlai ang an tuah bet men mi a si a ti.

Burma ralkap pawlin thuneihnak an pawnglak hnu in Bank staff pawl cun CDM an zawm ruangah an hna pangngai an sunzawm thei lo ih, Bank hna tam tak hi internet connection can ziangmawm zet lai cu ralkap cozah cun an tih khailak rual rual in, a rak khaihlak ve zel ih, Mipi pawlin paisa retluh (deposit )aiin laksuah (Withdrawal) tam sawn a si.

Bank leh cozah chelh tumtu te lakah rinnak an nghah ngam lo ruangah sum cangvai ti tam bik foreign company te cu an sumdawnnak ti tawp in an ram lamah an tung nasa ih, pawisa thleng tawn awknak khal a khaih lak thluh ih,Myanmar ram buai cun ei leh bar hawlnak lamah leh paisa hmangih hnatuannak hmuah hmuah cu a ti bahlah theh ih, Foreign Exchange leh Stock Market lamah Myanmar pawisa KYAT cun tangkainak a nei tam lo cih ta a si.

Mipi pawlin bank ih sin paisa an lak suah teuh ruangah cozahnak celhtu can cang SAC cozah cun ram relbawlnak a rorel khawl cang ter dingin paisa cang vai ding khawp sum  in a daih ta ngang lo ih, Magwe Region ,Chauk khawpi kiang Irrawaddy Tivakam lehlam ih Wazi Village huam sungih an paisa tuahnak khawl an neihnak hmun ah security tha tak thawn kilhimnak hnuaiah paisa note thar hi an hmanhmawh zetinan tuah ih, tu hlan ih an tuah mi paisa note cahnah  quality cu an tuah thar mi hin a tluk lo ih, a sinan  paisa lem a si tiin kan sim thei cuang lo ding.

Paisa tuahnak hmanrua leh thiam thil lamih bawm theutu Germany GIESECKE DEVRENT Company cun ralkap council cozah a rawn din ih sin  paisa tuahnak hmanrua ziangkim supply a ti tawp thluh ih,  An paisa tuahnak khawl cun a khawlsutnak ti ( INK) leh paper a mil awk loh cun felfai deuhin a tuahsuak thei lo a si.Paisa tuahnak ih an hman duh nawng lo mi  Rejected Paper simaw Russia ram in a bawm ruangih tuah thei leh fang an si.

Paisa hrangih cahnah mawi hman hi mirangtawng cun currency note/bank note/paper money tiin hman a si.Paper Money hi a mah te men cu cun man a nei lo ih, cozah nghet takin a pawm ruangah paisa hrangah pawm tlang leh hman hi paper money tih a si, Paper money standard hi Gold standard vekin a hlutnak a nghet chiah lo.Paper money hi a ram cozahin World Bank pawl thawn rawn aw in tuah ding zat uluk takin bituk ih,thunun a si lo ah cun  ram ECONOMICS in a tuar nghal zel a si.

Paisa an tuah bet mi hin a nghawng cu can ziang maw zet cu thil man a sang vivo ding ih, tawngkam dangin sim men sela pawisa in thil a lei theih a mal a si.Hi hi Economics term cun “Inflation ” tih a si. Ram in a duh aiih tam pawisa a tuah a si len  Bank in a paisa kawl tam sawn mipi hnenih a pek suak tam len thilman sang( inflation ) a um tlang pi theu a si.

Myanmar ram ih thil man sang khung tuk cu mai kuang lo nawrih ram relbawlnak thilah a ngaihnak thei lo pawl ramhnuk celh an tum ruang ah a si, hi vek lam hi cu  Rulputar Min Aung Hliang leh a lam tang pawl theihthiam ci a si ve lo.crdit tluanga chhakchhuak.

Author: admin

Leave a Reply

Your email address will not be published. Required fields are marked *