Bawipa Le A Thiang Thlarau Ngaihchiatter Ruangah Thihnak A Chuak

1. Buanchukcho hlan minung: Buanchukcho a rak tlun hlan ahkhan, BAWIPA nih, kha lio minung hna an sual hringhran le an lungthin ruahnak a țhat lo ning kha a hmuh tikah, ” Vawlei i minung a rak ser hna cu a ngai a chia i aa ngaichih ngaingai!” Noah lawnglawng nih BAWIPA lung a rak ton! Mizo nihcun, “LALPA cu a inchhir a, rilru nat nan a hman phah ta a,” a ti! Mizo KJV nihcun, ” a thinlung a na ngawih ngawih a,” a ti ( Gen 6:6 ). Zeizong vialte a tuah kho tu, Țhawnnak le Huham le Sunparnak in a khatmi, thla paruk a ngeimi vancungmi Serafim hna nih an thang țhat zungzalmi BAWIPA PATHIAN cu a dawt tukmi minung hna sual ruangah ” a lung a faak tuk i a ngaih a chia!”

Cu ruangah, a lung a tongmi Noah chungkhar minung 8 lawng a rak zuah hna i Ti in a rak thah dih hna! Kha lio minung hna ruang ahkhan, kan BAWIPA cu a ngaih a rak chia i lungdo hma bangin a thinlung cu a rak faak! Noah in chan hra hnu lawngah Abraham a hung lang i Abraham ah BAWIPA nih lungdinhnak a hmuh. Cucaah, BAWIPA nih Abraham PATHIAN ka si tiin aa chaal tawn i Abraham cu ka hawi a si a rak ti!

2. Moses hruaimi Israel mi hna:Salm 78:40-41 “Voi zeizat riamruam dik AMAH kha ramcar chungah khan an doh; voi zeizat riamruam dik a ngaih an chiatter! Atu le atu PATHIAN kha an hneksak atu le atu Israel Mi THIANG kha a thin an hun ter!”Cucaah “tih a nungmi a thinhunnak kha an cungah a thlet hnawh hna i hrawktu vancungmi a thlahhnawhmi hna nih khan harnak tampi a pek hna. A thin kha aa sum lo i an nunnak zong kha a zuah hna lo; rai in a thah hna ( Salm 78:49-50 ).

3. Juda/Israel siangpahrang hna chan:Isaiah 63:9-10 ” Annih a khamhtu cu vancungmi a si lo, BAWIPA hrimhrim kha a si. A dawt hna i an zawn a ruah hna caah a khamh hna. Hlanah khan a rak zohkhenh zungzal ko hna. Sihmanhselaw an doh i a THIANG THLARAU ngaih an chiatter. Cucaah BAWIPA cu an ral ah a cang i a doh hna.”Isaiah 29:13 BAWIPA nih, “Hi mi hna nih hin kan in biak tiah an ti, Sihmanhselaw an bia cu sullam a ngei lomi lawngte an si i an lung cu ka dangpi ah a um. Biaknak an timi cu minung serchommi phung le pupa nih an zulh tawnmi lam lawnglawng kha a si i an kaa in a chim a thiam sawhsawh in an thiammi kha a si.”Isaiah 29:14 “Cucaah cun a tlung lai tiah a ruah in an ruah hrimhrim lomi thil kha pakhat hnu pakhat in an cungah ka tlunter lai i cu nih cun a hlauh in a hlauh hna lai. An mifim cu mihrut ah an cang lai i an fimnak cu an caah zeihmanh țhathnemnak a ngei lai lo.”

4. Kan i zohchunh ding:1Korin 10:11-12 ” A cheu cu an rak phunzai bantuk khan nan phunzai awk a si lo, cu ti an tuah caah cun Thihnak Vancungmi nih a rak thah hna. Hi vialte an cung i a tlungmi hi midang nih i zohchunh awk caah a si. Zeicahtiah kannih kan caan hi donghnak a phak dengmangnak caan a si. Ka dir kho tiah aa ruatmi cu a tluknak hnga lo i ralring seh.Efesa 4:30 “PATHIAN THIANG THLARAU kha a ngaihchiatter hlah u.”A cunglei ka hun langhter mi hna hmangin, nihin vawleicung minung vialte hna le a Khrihfabu hna hmanh nih PATHIAN THIANG THLARAU hi zeitluk indah a ngaih kan chiatter ti hi ruat hna usih law, Abraham bantukin BAWIPA a dawtu a hawikom si ve hna usih.

Credit:Tluang Lian

Author: admin

Leave a Reply

Your email address will not be published. Required fields are marked *